Nongpoh:Na ka bynta ban ai ka jingkyrshan kaba pura bad pynjop don burom ia u Dasakhiatbha Lamare, u Kyrtong ka NPP na Mawhati Constituency, ki paidbah jong katei ka thain kiba la don kumba 14 hajar ei ei, mynhynnin ka sngi ki la mih na la ki shnong ki thaw bad hiar sha Madan Mawhati, ban sakhi ia katei ka jingialang paidbah kaba la pynlong da u Dasakhiatbha Lamare ha katei ka shnong.
U paidlang, uba ia lum ha ka jingialang U Ma Dasakhiat Lamare ha Mawhati, ha ka Sngi Balang:Rupang
U Dasakhiatbha Lamare, haba kren sha kitei ki phew hajar ngut ki paidbah, u la ong ba watla u dang long tang u kum u Kyrtong, hynrei u la lah ban leh ia shibun ki kam bad kata ka long naduh kaba pynshna ia ki Madan Phutbol, Surok lem bad kiwei kiwei ki kam kiba long na ka bynta ka jingmyntoi ki paidbah ka Mawhati Constituency.
“Lada ki paidbah ki jied ianga kum u Nongmihkhhmat, ngan trei khlem jingshongthait dei tad haduh ba ngan da lah ban khyllie ia kane ka Konstitwensi, kaba la long kum ka kper kaba la iehshrah bad kaba dang donkam ia shibun ki kam pynroi na ka bynta ki paidbah babun balang” ong u Dasakhiatbha Lamare. Shuh shuh, u la kren ruh da kaba ong “Nga kloi ruh ban iap na bynta ki paidbah ka Konstituency”.
Ha kane ka sngi, la ioh ia ka jingkren na u Conrad Sangma bad u James K. Sangma, ha kaba kine ki la pynshai paidbah ia ki kam lehdonbor da ka sorkar Congress kaba la ialam da u Dr. Mukul Sangma kum u Myntri Rangbah, la ka long ha ka synshar ka khadar bad khamtam eh haba iadei bad ka jingrah ia kiba ki skim pynroi sha Ampati kaba ka Constituency u Dr. Mukul Sangma.