Nga khlem pan jubab na u bah Allan, nga pan na dorbar: Teinwell

Shillong, 7 Naitung:
Kham mynshuwa ha ka por ba u bah Ardent M Basaiawmoit u dang long u Chief Executive Member ( CEM) ka Khasi Hills Autonomous District Council (KHADC) ka la mih ka jingkynnoh ba ka don ka jyrsieh bamsap kaba shyrkhei ha ka jingpynlong ia ka Tamasa Mawbynna ha Mawphlang (Monolith Festival) ha kaba katei ka EC u bah Ardent ka la thaw ruh ia ka komiti ban tohkit halor katei ka kam.
Dang shen ha ka iing dorbar ha ka 30 tarik u jylliew, u EM barim, ba dei peit ia ka tnad Arts and Culture ka KHADC, u bah Teinwell Dkhar u la kynnoh ruh ha iing dorbar ba ka jingbym lah ka Khasi Heritage Conservation Forum ( KHCF) kaba la khlieh da u bah Titos W Chyne kum u Chairman bad u bah Allan West kum u Secretary ban ai ia ka ripod halor ka jinglut jingsep bad ki jingmih na katei ka tamasa ka pyni ba ka don ka jingbam sap kaba shyrkhei bha ha katei ka tamasa.
Tang mar ia mih kate ka khubor u bah Allan West u Secretary katei ka Forum u la kren sha ki kot khubor ha kaba u la ong ba ki dei tang ki nongiarap ia ka KHADC ban pyniaid beit iaid ryntih bad ban thaw pisa na bynta katei ka tamsa hynrei nalor ba dang iarap ki shah kynnoh nongtuh pynban. U la pynshai ruh ia ka jingioh pisa ka Forum ha kaba iadei bad katei ka Tamasa.
Haba ia kren bad u Rupang u mynta ka sngi u bah Teinwell Dkhar, MDC ka UDP na Shella u la ong “Nga khlem pan jubab na u bah Allan West , hynrei ngan pan jubab na ka ing dorbar”. U la ong ruh ba ha ing dorbar u EM ba peit mynta ia ka tnad Arts and Culture u bah Antonio War u la kular hapoh iing Dorbar ban ai jubab hapoh shi taiew, “Nga dang ap ia kata ka shi taiew ia ka jubab u EM” ong u bah Tein.
Haba la kylli pat ba ka dorbar ka la long ha ka 30 tarik mynta sa tang shisngi katei ka shi taiew kan kut noh kaei ba u don ban ong, “Ngan ap ia kata ka shisngi ba dang sah bad ngan sa kren pat hadien ba la ioh ia ka jubab u EM uba la ai por shi taiew” ong u bah Tein.