Nga ioh jingmut ia ka skhim T.72hajar, na ka kular thok U Modi:Rahul

U Rahul Gandhi, President jong ka seng Congress, ula iathuh myn hynnin ka sngi, ba ka jingioh jingmut jongu ban pynbna ia ka bai nong kaba T.72hajar shisnem sha ki nongshong shnong baduk ha ka Ri, ka wan lyngba ki kyntien ba shu thok jong U Narendra Modi ban siew T.15lak sha baroh ki nong India.

Haba kren ha ka jing kanbas elekshon ha Anaj Mandi jong ka nongbah Jagadhari, ha Haryana, U Rahul u ong “Nga sngap ia ki jingkren jong U Modi, ha kaba u kular T.15lak ha ki katto katne sien bad nga shim ba kane ka dei ka kabu ksiar ban ai pisa noh sha u paidlang ba duk. U Modi, ula shu jler thylliej, hynrei nga te ngan nym shu jler satia” ong U Rahul.

“Nga la kylli jingmut na ki nongialam jong ka seng Congress, ha kaba ki la tih bniah ia kane ka phang, na ka bynta lai bnai kynthih bd kata ka long la ka sorkar Congress, ka lah ne em ban siew ia ka pisa sha ki account jong ki nongshong shnong kiba duk tam. Hadien hynriew bnai ba ki la pynleit jingmut, kumta ka la mih ka phang jong ka Nyay bad phi lah iohi ne em ia ka dur khmat jong U Modiji ha ki khyndiat sngi ba ladep, ba ula shu thangiong” ong U Rahul ha ka jingialang paidbah.

“Ngin jied ia kito ki longiing, kiba ioh kamai duna ia ka T.12hajar shi bnai bad ngin siew T.72hajar shisnem ha ki bank account jongki, ha ka skhim jong ka Nyay Yojna. U Narendra Modi,ula kular T.15lak sha uwei pa uwei u nongshong shnong, hynrei ula shu jler. Ka sorkar India, kan siew T.3.6lak sha ki longiing ha ki san sem ba kane kan sa urlong” ong U Rahul Gandhi.