Shillong: U Bah DD Lapang, Myntri Rangbah barim uba long u nongai buit ka sorkar MDA, u la ong u bah Hoping Stone Lyngdoh bam kwai ha u duwai blei, u dei kum u radbah ka jaitbynriew uba la long u snar uba kit ia u star ka jaitbynriew.
Ki Volunteer ialeh Hill State ka HSDP kiba shah pynkup burom
U Bah Lapang u la kren ia kane ha ka jingrakhe dap 50 snem ka HSPDP kaba long ha kane ka sngi Saitjain ha State Central Library, Shillong.
U Bah Lapang uba ia leit skul lang bad u Bah Hoping, iasah hostel lang ha Jaiaw, u la ong ba naduh ba u dang khynnah u dei uba kham tur bha shakhmat ban iarap ia ki jingeh ki paralok. “Ha hostel ba ngi iasah lang, haba don jingeh, ngi ailad nongialam ia u bah Hoping bad don ka por ba u la ialam ban iakynduh ia u Lat”, la ong u bah Lapang.
U la ong ba ia u bah Hoping ym shym la kha khraw hynrei u kham khraw ia kiba la kha khraw da kaba u la ai nuksa kum u Tirot Sing Syiem, u Patsha Napoleon Bonaparte bad kumjuh kum u President barim ka America u Abraham Linclon.
“U Bah Hoping um ju phai dien shisien ba u la iaid, u iaid beit shakhmat, u don marwei ruh u iaid, ki wan 13 ngut ruh u iaid bad ki wan 60 ngut ruh u iaid, khlem phai dien”, la ong u bah Lapang.
U Bah Lapang u la ong ba kito kiba shah set phatok kiba dei ki dkhot ka HSPDP ba ialeh Hill State, ki long kum u Tirot Sing,bad ka dei ka kabu ia u ban ioh iakren ia u bah Hoping uba u ia pule ryngkat, iasah lang, ha hostel ha Jaiaw.
U Bah Lapang u la ong ba u bah Hoping u wan na ka jinglong kaba rit, kaba duk hynrei u long uba khraw mynta uba mih na ka shnong Mawkyllei na nongkyndong.
” Ym shym la kha khraw ia u bah Hoping hynrei u la pynlong khraw, kito kiba khlem kha khraw, ki kham khraw ia kiba kha khraw kum ba jia ia u Abraham Lincoln u president ba 16 ba khraw ka ri Amerika”, u la ong.
U la ong ba ka jingmih ka jingiakhih ban dawa ka Hill State, ka dei hadien ba la mih ka jingkren na u Myntri Rangbah ka Assam u Gopinath Bordoloi ba ka Assam ka dei ia ki briew ka Assam da kaba thmu ban wanrah ka ktien Assam.
U Bah Hoping u la shah jied kum u Chief Organiser ki Voluntteer ka APHLC, hynrei hadien u la shah beh seng noh hadien ba um pdiang ia ka jingai ia ka sub state bad dei hangne ba la seng ia ka HSPDP ha kaba la jied ia u bah Hoping kum u nongialam kaba la jia ha u snem 1968, la ong u bah Lapang.
Ha kane ka sngi, la pynshongkun ia ka jingrakhe da ka jingrwai, bad la ioh ruh ban pynlait ia ka kot sahkynmaw da u bah Lapang kum u symbud kongsan katba ia u mot dur jong u bah Hoping ba la thoh lang bad ki MLA, ki MDC, ki volunteer jong ka HSPDP, la pynlait da u Dr Donkupar Roy.
Shwa ia kane, u president ka HSPDP u bah KP Pangniang u la ong ba haduh kine ki sngi, ka HSPDP ka la pynmih bun bah ki MLA, ki MDC nalor 2 ngut ki MP.
Ka Seng ka la leh burom ruh ia ki volunteer, ki MLA/MDC barim, ki nongialam ka party ha kane ka sngi.
Kiwei pat kiba ai jingkren hakane ka sngi ha ka jingialang ba la pyniaid da u bah Renikton L Tongkhar u MLA, ki long u MLA ka party u bah Samlin Malngiang, ka Kong Badariti L Nonglait ka pyrsa u Bah Hoping bad kiwei.