“Nga duwai, nga da pan na u Blei ban ai u khun rangbah ban ialam ia ka jaitbynriew”

Shillong, 11 Nohprah:
“Nga da duwai, nga da pan na u Blei por ba nga pun khun ba un ai ia nga u khun rangbah u ban ialam ia ka ri bad ka jaitbynriew-shisha nga la ioh da une” ong i kmie u bah H.S Shylla haba kren paidbah ha ka jingialang kaba la long ha ka sngi saitjaiñ jong ka taiew ha madan Lad Nongkrem.
I kmie u bah Shylla mynta i la don 84 snem karta bad ha ka por ba i pun ia u bah H.S Shylla i la ong ba i dang don 22 snem karta bad ha katei ka por ba dang pun ia u, i la ong ba i la duwai miet la bad sngi sha u Blei ba un ai ha i ia u khun rangbah uba dap rynieng ryniot bad uba la pynsleh da ka jingnang jingtip ban ialam ia ka ri bad ka jaitbynriew bad da shisha i la ong ba u blei u la kyrkhu ia i da kaba ai da u bah H.S Shylla.
Ha katei ka jingialang paidbah ka seng UDP Nongkrem kaba la long ha ka sngi saitjaiñ , ki la don bunbah ki nongkren kiba la pynsngew sha ki paidbah ia la ki jong ki nia elekshon jong ki bad napdeng kiwei pat ki nongkren don uwei u nongkren uba la ong ba u bah H.S Shylla u dei u Moses jong ka Nongkrem konstitwensi u ban ialam ia ki paidbah ka Nongkrem sha ri Kanaan kumba la ialam u Moses ia ki khun Isreal. Utei u nongkren u la ong ba lada ki paidbah kim jied ia u bah Shylla mynta ka kynti ka long kumba ki jied ia ki nongialam ki ban ialam ia ki sha Sodom –Komora.
U bah Shylla pat haba kren ha katei ka sngi ia kiba bun ki mat , u la kynthah ruh halor ka jingwan kyntur pud ka MUDA sha ki jaka ba hap hapoh ka jingpeit ka District Council ha kaba u la kynnoh ba u MLA ka Nongkrem u bah Ardent M Basaiawmoit u la ia don ka jingiasngewthuh jingmut bad ka sorkar bad u ong sha ki paidbah ba MUDA ka mut ‘ Mukul Understands Deals with Ardent’.