“Nga duwai ia u Blei ba un ktah ia ka mynsiem u myntri PWD”

Shillong, 09 Lber:
U MLA ka Maw-shynrut u Bah Witting Mawsor u la pynpaw ba ka jingiakhun jongu ban dawa ban ioh surok kaba bha kam shym la kut tang ha kaba leit kyrpad ha ka sorkar, u myntri ka PWD hynrei ula phai ruh sha u Blei da kaba duwai ba Un ktah ia ka sorkar bad u myntri PWD ba kin peit ia ka jingsniew ha West Khasi Hills.
Haba wanrah mynta ka sngi ia ka rai halor ka jingsniew ki surok ha West Khasi Hills, u Bah Mawsor u la ong, “Nga la duwai shisha ia u BLei ba un ktah ia ka mynsiem u myntri ka PWD bad ia ka sorkar hynrei kane kam shym la urlong satia kampher lada kim sngap ruh u Blei un sa ktah ia ki”, la ong u Bah Mawsor.
U la ong ba u la iai kren bad u la iai kynduh man ka por ia u myntri PWD bad ka sorkar ba kan phaikhmat lem ia ki surok ha West Khasi Hills hynrei khlem jingmih eiei haduh mynta.
“Ka Surok Nongstoin sha Maweit ka dei kaba sniew tam ha ka pyrthei, wat u kulai ruh un kdiah kjat lada un iaid ha kane ka surok”, la ong u MLA ka Mawshynrut.
U la ong ba kiwei ki ong ba ki don ka surok kaba bha tam ha ka pyrthei, don kiba ong ba ki shna ia ka surok kaba khring ia ki samla (romantic road) hynrei ka surok Maweit kaba la shna naduh ka por ka sorkar Assam, ka dei kaba sniew tam ha ka pyrthei.
U la ong ba ka thain Maweit bad ka West Khasi Hills ka dei ka jaka kaba riew spah bha ha ka spah mariang namar ba ka don lut ki marpoh khyndew naduh u dewiong, u uranium, ki dieng ki syntiew bad bun kiwei hynrei haba phai sha ka surok ka long kaba sahdien tam napdeng baroh ki district.
“Ki surok ha West Khasi Hills kiba bun ki dei tang ki surok khyndew suda”, la ong u Bah Witting bad bynrap ba namar ka jingsniew palat ka surok ka la pyntieng ia ki nongshangkai pyrthei ban leit iaid kai sha West Khasi Hills.
Katba u MLA ka Rambrai-Jyrngam u Bah KP Pangiang haba shim bynta ha kane ka jingiatainia, u la ong ba naduh u snem 2013, ka sorkar u Dr Mukul Sangma ka la kular ban ai surok ban shna surok kaba bha ha baroh ki jaka ha ka jylla hynrei kaba sngewsih ka long ba haduh mynta kam urlong satia.
“Naduh u snem 2013 haduh mynta, ka sorkar ka shna surok tang 119 km ha baroh kawei ka jylla bad lada khein uwei u MLA ne ka konstitwensi ka ioh surok tang mar 1.98 km”, la ong u Bah Pangiang.
U la ong ba kaba sngewsih ka long ba ka tnad PWD ka la leh bein ia ka thain ha kaba ia ki surok ki bym pat dep ruh, la ai jingtip sha ka sorkar pdeng ba la dep nadong shadong.
U MLA ka Rambrai-Jyrngam u la kyntu ia ka sorkar ba kan nym leh shiliang ia ka West Khasi Hills da kaba mang skhim kumjuh khamtam ia ka surok khnang ban wanrah ia ka roi ka par ha ka thain bad ka jylla.
Katba kiwei kiba iashim bynta lang kynthup u MLA ka Mairang Bah Metbah Lyngdoh, u MLA ka Nongstoin Bah J Jyndiang, u Saleng A Sangma, u Nihim D Shira ki la kyntu ia ka sorkar ba kan bishar biang ia ka surom shna ia ka surok bah Shillong-Nongstoin-Tura namar ba ka don ki jaka ba la wanrah ia ka jingjia aksiden kali namar ba ka jingshna ka kompeni khamtam ha ki khongdong kumba la jia ha Nongspung ha kine ki sngi.
Kiwei pat kiba shim bynta ha kane ka jingiatainia ki kynthup ia u nongialam liangpyrshah u Dr Donkupar Roy, u Bah Ardent M Basaiawmoit.