Nga dei uba kohnguh ia ka riti synshar, ym ki 7 ngut ki MDC: Pynshngain

Shillong, 15 Lber:
U Chief Executive member (CEM) ka KHADC u la ong ba napdeng ki 8 ngut ki MLA/MDC, dei tang ma u, uba bud bad kohnguh ia ka riti synshar ka ri bad nakata ka daw, u iai sah kum u MDC/MLA ym kiwei 7 ngut kiba iehnoh ia ka kam MDC tang shu pdiang ka iing dorbar thawain ia ka Ain Khang Bat Arkam ka Prevention of Disqualification (Members of the Legislative Assembly of Meghalaya) Act, 2015 kaba la pyntrei kam naduh ka 1 tarik Risaw mynshem snem, ka bym lerkam haduh kine ki sngi.
“Nga don hangne ha iing dorbar mynta namar ba nga dei uba bud ia ka burom ia ka ain. Hato nga dei u nongpyn khein ain haba nga bud ia ka riti synshar ka ri”, la ong u Bah Pynshngain haba kaba twad jingshai halor ka ain khang bat ar kam, hapoh ka iing dorbar mynta ka sngi.
Na ka liang u Symbud Myntri Rangbah u Bah Rowel Lyngdoh u bym lah ban pynshai bha ia ka jubab, u la ong ba ka shong ha u briew shimet ban bud ia ka ain.
U la ong ba kane ka kam ban pynduh ia ka jinglong MLA/MDC, ka dang sah ha ka kti jong u Lat ka jylla bad ka sorkar ka dang ap ia ka jubab na ka election commission ka India halor kane. U Bah Rowel u la iathuh ruh ba kane ka kam ka dang don ruh ha ka Kashari High Court.
Shwa ia kane, u Bah Ardent M Basiawmoit u la ong balei ka sorkar kam shym la leh eiei ia u Bah Pynshngain u bym shym la iehnoh ia ka kam MLA/MDC hadien ba la pdiang ia ka ain Khang Bat Ar Kam. “Hato tang namar ba u dei na kajuh ka party, ka sorkar kam shym la leh eiei. Lada sorkar kam lah ban pyntreikam ka mut ba kiba iehnoh ia ka kam MDC kin long tang ki riew leh biria”.
Katba u Bah KP Pangniang u la ong mano ban ai jubab sha ki paidbah halor ka jingiehnoh kam ki 7 ngut ki MDC hadien ba la pdiang ia kane ka ain. “Hato ka sorkar kan shim jingkitkhlieh ne ki MDC namar ba hap ban ai jingshai sha ki paidbah”, u la ong.
7 ngut ki  MLA kiba long MDC kiba la iehnoh ia ka kam MDC  na ka KHADC ki long U Bah HDR Lyngdoh, Bah Ardent Miller Basaiawmoit, Bah Sanbor Shullai, Bah Metbah Lyngdoh, Bah HB Nongsiej, Bah KP Pangniang bad Bah Stephanson Mukhim ka JHADC.