“Nga dei ka Khasi, ngam donkam Trading License” ong ka Prodipta Khongwir

Shillong,19 Jylliew:
Ha ka jingleit khynra Laisen Khaii ka KHADC sha Laban mynta ka sngi, kaba pynlyngngoh ka long namar ba kawei na ki dukan ba la shah khang ka la pynkam trai ha ki Khasi bad kawei pat ka dukan ka la kam Khasi ialade.
Ka Rumi Store, ka dukan kaba katkum ka rikod jong ka KHADC ka dei ka dukan jong u Mukta Ali, hynrei haba ki pulit Enforcement ki la leit ban khang la kam trai pat ia katei ka dukan da ka briew kaba la kam ialade ba ka dei ka Khasi , bad ka dei na ka jait Khongwir, katei ka briew ka dei kaba la tip kyrteng kum ka Prodipta Khongwir, kam da nang bha ban kren Khasi ruh . Haba ia kren bad katei ka Prodipta ka la lyngngoh namarba la khang ia ka dukan jong ka bad ka la ong ba kam don kam Trading License namarba ka dei ka Khasi, “Nga dei ka Khasi, ngam donkam Trading License, u kpa jong nga dei u Dkhar” ong ka Prodipta Khongwir kaba la iathuh ba ka shnong trai jong ka , ka dei na Siatbakon ,ka shnong kaba don sharum Pynursla.
U Rangbah Shnong ka Madan Laban bad Riad Laban, u bah Ioster Sun u la iathuh ba katei ka briew kam don tang ia ka Schedule Tribe Certificate ruh, watla ka kmie jong ka- ka dei ka Khasi paka, kumta u la ong ba na ka liang ka shnong ka don jingar tatien ioh ba katei ka briew ka shu kam ialade ba ka dei ka Khasi, namarba haba sngap tang ia ka sur kren la sngewthuh ba kam dei ka Khasi.
Kawei pat ka dukan kaba la shah khang katkum ka rikod jong ka KHADC ka dei ka dukan jong u Uma Sharma, hynrei haba ki bor ka KHADC ki la leit ban khang ia katei ka dukan, kawei ka kynthei briew kaba dei ka bar jylla kaba shong die ha katei ka dukan ka la ong ba kam dei ka dukan jong ka , hynrei ka pynshong ia ki trai, katei ka dukan ka dei kaba la ai kyrteng ‘Ryntathiang Store’. Katei ka briew ka la ong ba mynshuwa ka la shim wai ma ka bad ka la die dukan hynrei haba kam ioh Trading License hadien ba la aplai, la shong hi noh da ka trai, bad mynta kam dei shuh ka jong ka.Ha ka por ba khang ia katei ka dukan ruh la sakhi da u Rangbah Shnong katei ka shnong u bah Ioster Sun.
Lah ban kdew, ba watla ka don ka jingpyni nia na ki trai dukan ha Laban shuwa ban khang hynrei ka KHADC kam shym la sngap ban iaid beit ka kam shakhmat ban khang shisyndon ia ki.