Nga angnud ban ïoh shakri ïa ka jylla lajong, ong U Ankur Das

Shillong:U Ankur Das ba dang shu pass ïa ka Indian Administrative Service (IAS) ba la pynlong da ka UPSC 2021, uba la poi ruh ha ka kyrdan kaba 52 u pynpaw ïa ka jing sngewnguh ïa ki paidbah ka jylla kiba la ai khublei kitbok ïa u halor kane ka jingpass jong u ïa ka eksam UPSC.

U la ong ba u da sngewkmen ïa kane ka jingpynpaw jong ki paidbah ia ka jingieid ïa u. U la pynpaw ba bun na ki riew paw khmat ka jylla kila ai khublei ïa u.
Haba kren ha ka jingïalang pynkup burom ïa u na ka liang jong ka Greater Laban Community Development Society, u Ankur la ong ba bun ki la kylli, la u sngew kumno haba pass ïa kane ka eksam IAS bad balei u jied ïa kane, ka jubab kaba u la ai ka long ba dei tang kane ka kam ban noh syniang sha ki paidbah bad kaba dei beit bad ki paidbah bad ban shakri ïa ki.

“Kane ka jingïadei bad ki paidbah naduh ka por ba dang khynnah bad haduh mynta ka kam IAS ka dei kaba hakhmat ban ai ka jingshakri ïa ki paidbah ka Ri ha kine ki 75 snem kiba la leit bad ka long ka burom na ka bynta jong nga ruh ban don ha kane ka kam bad nga khmih lynti ban wan biang sha ka jylla ban ai ka jingshakri ha ka jylla,” ong u Ankur da kaba pynpaw ruh ïa ka jingthrang ban ïoh shakri ïa ka jylla kaba u la heh lah san bad ba u la khamtip ïa ka tynrai jong ka.