Nongstoiñ: Ka kynhun ialehkai jong ka Sawlad SC kala iai bteng ban khur ia ka jingjop ha ka jingiakhun ia ka Super Division jong ka lympung Nongstoiñ District Sport Association (NDSA) bad da katei ka jinglah jong ka Sawlad ban iai bteng ia ka jingioh khur ia ka jingjop kala pynlong ruh ia ka kynhun ban nang ioh kamai kham bun ki point.
Ha ka jingiakhun kaba la long hynnin ka sngi ka Sawlad kala lah ban pynliem noh ia ka kynhun ialehkai jong ka Mawliehbah Sc da 3 kol la 0 bad ia kitei ki 3 tylli ki kol la ioh ban thep da u Backstar Puweiñ ha ka minit kaba 19 bad u Rishot Mawlot ha ka minit kaba 21 bad 41.
Haba phai pat sa sha ka jingiakhun ha ka 1st Division kaba la long ha pdeng ka Upper New Nongstoiñ pyrshah ia ka Porshangbet Sc kala long shisha ka jingiakhun kaba iakhaid bad ia biang bor bha hynrei ha kaba kut ia u nam tam la ioh ban khur da ka Porshangbet kaba la pynliem noh ia ka Upper da 3 kol la 2 kol.
Shuh shuh ka jingiakhun ka ban bud ha ka Super Division kan long biang mynta ka sngika 9 tarik ha kaba ki ar tylli ki kynhun ba khlaiñ bor jong katei ka lympung kin ia khun pyrshah kata ka Nongpyndeng pyrshah ia ka Pyndengrei bad ka jingiakhun kan sdang ha kapor 2:00 PM bad ha ka 1st Division pat ka Steplanglur kan ia kynduh pyrshah ia ka Byrki ka ban sdang ha ka por 12:10 PM ha ka madan NDSA ha Nongpyndeng.