Napdeng ki MLA liangsynshar, tang u bah SK Sunn bym treh kam Chairman

Shillong: Napdeng baroh ki MLA ba don ha ka liangsynshar, dei tang u MLA ka Mawphlang u bah SK Sunn u bym treh ban bat, wat la ka la don ka jingtyrwa bad ka daw, ka long ba um kwah ban shu pynsyrwa kai ia ka pisa jong u paidbah.

Haba kren myn hynnin ka sngi, u bah SK Sunn u la ong ba ha ka jingshisha ka la don ka jingtyrwa ia u naduh mynshwa ban bat ia ka kam chairman jong ki Board ne ki Corporation ka sorkar, hynrei u la kyntait namar ba um kwah ban shu pynlut kai ia ka pisa u paidbah.
“Ka la don ka jingtyrwa ba ngan bat ia ka kam chairman ha ki tnad sorkar hynrei ngam shym la treh namar ba nga sngew ba ka dei ka jingpynlutkai ia ka pisa jong u paidbah”, la ong u bah SK Sunn.
Ha kajuh ka por, u MLA ka Mawphlang u la ong ba um shym la treh ruh ban shim ia ki PSO ne pulit pahara, namar ba um pat sngew donkam watla ka sorkar ka la phah sha u da u pulit synran.
“Ngam shym la treh ban shim ia u PSO ruh wat la ki la phah namar ba ngam pat sngew donkam”, la ong u bah SK Sunn.
Halor ka jingshah weng noh u Samuel Sangma na ka kam chairman ka Fishery Development Board, u bah Sunn u la pynshai ba kum u briew uba la tip ia kane, kam dei kaba shisha namar ba la pynsangeh noh ka sorkar namar ba kane ka Board kam don ka kyndon ain ba u lah ban sei ia ka honorarium, kumba long kiwei ki tnad sorkar bad ka sorkar kan sa ai da kawei ka kam.