Nangpaw pyrthei ki kam shah nion bein ki Khasi, kiba trei ha ICAR

Nongpoh:Ki nongialam na ki kynhun sengbhalang na Ri Bhoi, kiba kynthup ia ka HANM, CoRP lem bad kiwei, hynnin ka sngi ki la bitar eh, haba ki la tip ba ka la don ka jingshah nion bein ia ki Khasi, kiba trei bylla sngi ha National Bureau of Plant Genetic Resources (NBPGR), Regional kaba don ha ICAR Umiam, namar ba kim shym la ioh thikna ia ka bainong trei kaba thikna ha katei ka jaka kaba ki trei.

Haba shimkhia halor katei ka jingujor na ki nongtrei ha katei ka jaka, ki nongialam jong kitei ki seng kiba kynthup ia u Bah Bandary Ryntathiang, President ka CoRP, Sengkmie, nangta u Bah Pateng Myrsing, President ka HANM Ri-Bhoi District lem bad kiwei, ki la leit ban kynduh ia u Dr. Harish G.D Scientist bad Officer-In-Charge ka NBPGR, na ka bynta ban iakren halor ka jingshah ot tulop ki nongtrei kiba trei ha katei ka jaka.

Hadien katei ka jingleit kynduh ia utei u nongpeit ia katei ka jaka trei ki Khasi, ki nongialam jong kitei ki seng, ki la pynpaw ba ki bitar eh ba ki Khasi kiba trei ha katei ka jaka, kin shah lehbein da kaba shah ot tulop, haba kim ioh ban leit trei, kata ha kaba kum kane ka por ba ha ka jylla la pynbna ia ka Lockdown, namar ba kim ioh ia ki kali kamai ba kin leit trei sha katei ka jaka.
Ha ka jingiakren bad kitei ki nongialam seng, utei u briew uba dei peit ia katei ka jaka, u la kren kyllain laiphewjait bad uba la pyrshang ban aidaw da kumne kumtai, da kaba kynnoh kylla ia kitei ki Khasi, da kaba ong ba kim wan trei tista bad kaba la pynlong ia ka tnat ba kan ot tulop syndon ia ki.

Halor katei ka jingkren utei u nongpyniaid ia katei ka jaka, kitei ki nongialam seng, ki la bitar eh, ha kaba kim shym la pynsngap ia ka jingkren utei u briew, hynrei ki la iai buh ia ka jingdawa, ba lada ka long ha kano kano ka rukom ruh, hynrei katei ka tnat ka dei ban siew beit ia ka bai bylla ia kitei ki nongtrei Khasi kiba la trei ha katei ka jaka.

Haba kren sha ki lad Pathaikhubor, u Bah Bandary Ryntathiang bad kumjuh ruh u Bah Pateng Marsing, ki la dawa na katei ka tnat ba ki dei ban siew dep noh ia ka bainong trei ki Khasi kiba trei ha katei ka jaka bad lada kim lah ban siew, ki la byrngem ba kin sa leit ban khang tala syndon ia katei ka tnat treikam ha katei ka jaka.