Nangpaw ka Ri Bhoi District halor ka jingpynmih ia ki Sohtrun

Nongpoh: Katba nangmih ki sngi, ka Ri Bhoi District, ka la nangkiew halor ka jingpynmih ia ki Sohtrun bad halor kane la ioh ba wat ha kiba kum kine ki por, kaba dei ka por kaba u Sohtrun u duna bha, hynrei la iohi ba bun na ki dukan kiba don harud surok ha Ri Bhoi, ki buh ha ki dukan bad kaba la pynpaw shai halor ka jingnangkiew ka kam rep Sohtrun ha Ri Bhoi.

Kumba ka long ha ki por kiba la leit, ha ki por tlang kham niar ban iohi Sohtrun ha ki dukan ha ki por tlang, hynrei kumba ka long mynta, la iohi ba la jan manla ki dukan ki buh Sohtrun, hynrei kaba kham phylla ka long ba ki don ki dukan kiba die ha Surok, kiba die beit tang ia u Sohtrun.
Haba ioh ban iakren bad kito nongdie Sohtrun harud surok, wat na ka liang jong ki ruh, ki la kubur ia ka jingnangkiew ka Ri Bhoi halor ka kam pynmih Sohtrun, ha kaba ki la ong ba ha ki por kiba kham mynshwa, u Sohtrun u mih tang shisien ha ka shisnem, pynban mynta pat lah ban ong ba u la mih bad lah ban die paidbah ha baroh ki Saw Aiom, kaba mut baroh shisnem lynter.
Haba pyrshahng ban kylli halor ka jingnangkiew ka rukom pynmih Sohtrun, u Nongthohkhubor u la ioh ban iakren bad iwei I riew tymmen iba dei I nongrep Sohtrun bad ruh ban die ha surok, ha kaba katkum ka jingiathuh jong I, la sngewthuh ba ka nongrim kaba la pynlong ia ki ban kin ioh die ha baroh ki saw Aiom, ka dei namar ka jingtrei shitom bad ruh namar ba ki la sngewthuh ia ka jingiohnong lada ki lah ban sumar bha ia u Sohtrun.
Lada kylli halor ka Iew ka hat bad ka rukom ka kin pyniaid ia kitei ki Sohtrun, ki la iathuh ba kumba ka long mynta, ka iew die Sohtrun ka iaid beit na ka bynta ban die sha ki paidbah bad ki nongleit nongwan, hynrei watla katta lada kim lah ban die sha ki paidbah, ha ka por janmiet ki don ki briew na Assam, kiba la wan ban shim ia kitei ki Sohtrun, watla ka dei ha ka dor kaba kham duna.
Kumta na kaei ka sur kaba la iohsngew na kitei ki Nongrep bad Nongdie Sohtrun, la sngewthuh ba ki nongrep Sohtrun, ki kwah ia ka Iew kaba kham biang, ia kaba ki lah ban die ha ka dor kaba biang bad kaba ki lah ban pynbiang ia ka iing ka sem hi baroh kawei. Namarkata ka la dei ka por ia ki nongmihkhmat bad ia ka sorkar jylla, ba ki dei ban pyrkhat janai na ka bynta ban nangkyntiew shuh shuh ia ka kam rep Sohtrun ha Ri Bhoi, namar ki don bun ki briew kiba dei ki nongrep Sohtrun bad kiba apkhmih lynti na ka kam Rep Sohtrun ban pynbiang ia ki jingdonkam hapoh ka iing ka sem.