Nangne shakhmat, lada kwah ban sei pisa palat T.50 hajar lah ban sei da u aadhar number ruh

New Delhi: Nangne shakhmat, kito kiba don ia u aadhar number, ki lah ban shim da utei u number jongki bad ban sei pisa kaba palat ia ka T.50hajar, ha kaba mynshwa, la ju pyndonkam da ka pan card.
La iathuh ba nangne shakhmat, ki Bank bad kiwei de ki tnat sorkar, kin hap ban pynkhreh, ban pyndonkam ia u aadhar, ha kaba mynta la ju pyndonkam da ka pan number, ong U Ajay Bhushan Pandey, Revenue Secretary ka sorkar India, hynnin ka sngi.
“Mynta phi don 22 crore u pan number, uba la pyn iasnoh bad u aadhar number bad nangta sa 120 klur ngut, kiba don aadhar, kumta lada phi donkam ia u pan, kumta phi dei ban don shwa ia u aadhar, sa leit sha u pan number bad sa pyndonkam, katba kito kiba don aadhar, kim donkam ban ioh ia u pan number” ong U Pandey.
U Pandey, u iathuh shuh shuh ba lyngba U Aadhar number, yn lah ban sei pisa palat ia ka T.50hajar, khlem da pyndonkam ia u PAN.
Ban khanglad ia ka jing pyndonkam pisa tuh, kumta la pyndonkam da u PAN, na bynta ka jingsiew pisa kaba palat ia ka T.50hajar bad U PAN, u donkam ruh lada thied jaka ne thied iing kaba palat ia ka T.10lak.
U Pandey, u iathuh ruh ba U Permanent Account Number (PAN), un iai long uba lah ban pyndonkam, ha kaba ki briew ki lah ban pyndonkam da u PAN lane kumjuh da u aadhar number, katba kum ka jingsngew bit jongki.