Nangjur ka thma pohing ka seng Congress ha ka jylla

Shillong, 17 Risaw:
Ka thma hapoh ka seng Congress ka la nangjur nangjur bad mynta ka kynti ka jingiakynduh ka long para ba nep ki reng bad katei ka dei ka jingialeh hapdeng u MP jong katei ka seng bad ki heh jong katei ka seng ha kane ka jylla. Katei ka jingialeh ka ban sdang thymmai hapoh ka seng Congress ka dei hapdeng ki nongialam ka MPCC ba kynthup ia u bah D.D Lapang bad u MP ka Congress na Shillong u ma Vincent H Pala.
Ka Meghalaya Pradesh Congress Committee (MPCC) kan sdang ia ka sienjam jong ka da kaba kan ripod sha ka AICC halor ki jingkynthoh halor ki jingkynthoh u ma Vincent H Pala, MP ka seng Congress na Shillong (Lok Sabha) konstitwensi ia ka seng Congress ha kane ka jylla namar ka jing sospon ia u CEM ka KHADC uba dei ruh u MDC ka Congress na Mawsynram u bah Pynshngaiñ N Syiem.
Haba kren sha ki nongthohkhubor mynta ka janmiet u President ka MPCC u bah D.D Lapang u la ong ba ka seng Congress kan khot ia u ma Pala ban sngap kaei ba u don ban kren, “Ngin khot ia u, ngin ripod ruh sha ka AICC” ong u bah Lapang.
U bah Lapang u la ong ba ha ka jingshisha haba don kano kano ka jingiakynad ha ka seng Congress ha kane ka jylla u bah Pala u dei ban long kum u hynmen rangbah, “Kumba long baroh shi katta haba don ka jingkynad hapoh ka seng Congress ha ka jylla u MP u ju long u hynmen rangbah ban pynbeit” ong biang u bah Lapang.
“Ha ka jingshisha ngim ju tuklar than ia kiba kam kiba kham hapoh, hynrei kaei kaba jia mynta i kumba ka kyllaiñ pynban kaba hap ban pyrkhat bha” bteng shuh shuh u bah Lapang.
U bah Lapang u kyntait ruh ia ka jingkren u bah Pala uba la ong ba ym shym la pyntip eiei ia u halor katei ka kynrum kynram kaba mih dang shen hapoh ka Congress ha kaba u la ong ba ka kam jong u bah Pynshngaiñ N Syiem ka dei kaba la slem bah kaba ka AICC ruh ka la pyrshang ban pynbeit hynrei um don ka mon ban ia kren.
Lah ban kdew ba mynhynin ka sngi u ma Vincent H Pala u la kren sha kawei na ki lad khubor kaba u pynpaw ka jingbym sngewiahap halor ka jingshah sospon u bah Pynshngaiñ ha kaba u la ong un leit ban ia kren bad u Vice President ka AICC u Rahul Gandhi shaphang katei ka kam.
Ula pynpaw ruh ka jingsngewsih namar ba ka Congress ka la shim ia ka rai ban sospon khlem da ailad ba un pynshai shuwa. U la kynthah halor ka jingkynnoh ka seng Congress ba u bah Pynshngaiñ u ialeh pyrshah ia ka Party ha ka elekshon shiteng samoi ha kaba u la ong ba ka jingialap elekshon shiteng samoi kam pat sdang. U la kynnoh ruh ba katei ka jingsospon ka dei kaba la leh tuh tang da katto katne ngut ki briew na ka seng Congress.