Shillong: Ka jingkylla rong blue ka Wah Lukha ka nangjur kat nangmih ki sngi, haba baroh kiba iaid lyngba u suroh bah NH-6 ki sakhi ia kane.
Kane ka jingkylla rong suiñ bneng kane ka wah mynta u snem ka la sdang naduh la shi taïew tam eiei. Ki don ki nongtong dohkha kiba iathuh ba mynmiet ki leit ban tong dohkha namar ki dohkha ki jngi sharud (ryngkew) shaba jyndong ka um namar kim nud ban im ha jylliew.
Kane ka la pynsuba ba kane ka um ka la long bih bad ki dohum kim lah shuh ban im ha jaka ba jylliew kumta ki phet sha ryngkew bad ki nongtong dohkha ki ioh ban kem ne tong da kaba suk.
Ka seng bad ki paidbah kim lah peiphang shuh ia kane ka rukom kylla rong ka wah ha baroh shilynter kaba iai jia manla u snem. Lada ka iai jia shi iai jia kumne manla u snem kan poi ka por ba ki dohum baroh kin jah noh bad yn sa sah tang ka khana sah kynmaw ia kane ka wah. Wat haduh mynta kane ka wah ba shngiam ban dih ha ki por mynshwa mynta pat ka la long bih ym don ba nud ban dih. Dang ha kine ki khyndiat bnai ba la leit kata ha u bnai iaïong (April) kane ka wah ka kylla rongblue, ki dohkha ki la iap bad ka seng ka la buh ka jingujor ha Lumshnong Police Station, hynrei haduh mynta ym ioh kaiphod eiei na ka tnat pulit.
Lah ban pynkynmaw ruh ba ka seng dang ha ki khyndiat snem kata ha u 2012 la dep dawa na ka sorkar lyngba ka ophis u Deputy Commissioner ban shim ia ka jingtohkit ba laitluid (Independent Inquiry), hynrei kata ruh ka sorkar ka khlem leh. Ka seng ka pynrem jur ia kane ka jingpynjaboh ia ka wah lukha bad pynrem jur ruh ia ka tnat Ministry Environment, Forest kaba la sngap kuman halor ka jingiap da ki hajar ki dohkha ha kane ka wah naduh u snem 2007.
Ka seng sa shisien kan leit buh jingthoh sha ophis DC ban dawa biang ia ka jingtohkit ba laitluid bymdon ka jingshah liang khnang ban tip mano ba don kti ha kane ka kam lada na ki company ne ki riew shimet. Ka seng ka pynrem jur ruh ia ka tnat MSPCB kaba sngap mynthi kaba shu leit tong um pyndep rukom ne leh mynleh ha ka por ba kylla rong kane ka wah, ka khlem leit ban wad ka jingshisha na tynrai nangno kine ki mih, ki lut sngi lut miet ban pynleit jingmut tang ia kita ki public hearing ki company pynjot mariang bad ban bam duh ia ka khyndew ka shyiap jong ka pateng ban wan.
Ka long ka jingma kaba khraw ia ka koit ka khiah lada kum pyndonkam bakla haba dih ne sum bad sait ha kane ka wah namar ha u snem 2007 ba la jia nynkong ka jingkylla rong ka um bad ka jingiap da ki hajar ki dohkha, ki bor synshar district ki la pynjari ka kyndon aiñ , ba la khang pyrshah ia ki briew ban pyndonkam ia ka, ong ka kyrwoh na u S. Bamon, General Secretary KSU Narpuh Circle.
Phi don ban ong eiei?