Nang stait ka GNLA, wan pyndem 14 ngut, kynthup U Finance Secretery

Shillong, 09 Jymmang:
Ha kane ka taiew ba la dep, 14 ngut ki ehrang ka Garo National Liberation Army (GNLA) ki la wan pyndem wait, sa mynta tang hadien san sngi, 14 ngut ki ehrang kane ka seng ki la wan pyndem wait biang ha Police Headquarter, Shillong ba la pdiang da ka Myntri kam pohing ka jylla ka Kong Roshan Wajri, u Chief Secretary KS Kropha bad u DGP Rajiv Mehta.
Ki dkhot ka GNLA ki la nang stait mynta da ka jingwan pyndem wait ter shi ter ki dkhot jongka.
Kiba wan pyn dem ki kynthup u Belding Ch Marak ba khot sin kum u Rakkam uba bat kum u Finance Secretary, Mathew Ch Marak ba khot sin kum Sacheng kum u Area Commander ka Chokpot, Sengrak M Sangma ba khot sin kum Ranggam Dy Area Commander, Sengkal Ch Marak ba khot sin kum Kongsil u Dy Area Commander, Sengpan M Sangma ba khot sin kum Timtam u Lance Corporal Finance, Tingku D Sangma ba khot sin kum Gona, Salnang S Marak ba khot sin kum Gando, Minnin B Marak ba khot sin kum Chanang, Okchie Ch Marak ba khot sin kum Tojrang, Jangam T Sangma ba khot sin kum Challangpa, Sempil Ch Momin ba khot sin kum Saljepa, Clever Ch Marak ba khot sin kum Dompa, Walmen B Marak ba khot sin kum Tom, bad u Poth S Sangma ba khot sin kum Daria.
Ki la wan pyndem ryngkat ki tiar ialeh jongki kynthup ki HK Rifle, AK-56, Pistol, ki tiar phah khubor.
Kine kine ki samla ba la shah ialam bakla ban long ehrang ki la sngewthuh ia ka jingbym ler ka jingshong sha khlaw hapoh ka jingialam bakla jong u rangbah shipai shu kam u Sohan D Shira bad ki la rai ban wan phai noh sha ka imlang sahlang lyngba ka jingbtin lynti jong ki nongialam niam, ki nongialam seng bad ki paidbah ka Garo Hills.
Ha kajuh ka por, ki pulit ki la ong ba ka jingkhynra lehnoh da ka Hailstorms Operation-3 kan iai bteng ha Garo Hills.
Na ka liang u DGP u Rajiv Mehta haba kren ha ka jingdon lang ka Kong Roshan u la ong ba ka sorkar kan nym iakren bad ki lehnoh hynrei ki dei ban wan pyndem.
“Ym nym iakren ne khot iakren, ki dei ban wan pyndem”, la ong u DGP.
Kumjuh ka Kong Roshan ka la ong ba ki lehnoh ki dei ban sangeh noh ia ki kam bymman bad ban wan shakhmat ban pyndem ban im ka jingim kaba thymmai.