Nang pyrkhing ki kyndon, ia ki kali kamai ha Shillong bad ha ki nongkyndong ka East Khasi hills

Shillong: Ka Deputy Commissioner, East Khasi hills District, ka la nang teh kyndon biang ia ka leit ka wan jong ki kali ha ka nongbah Shillong, ha kaba ha ka hukum, kaba pynmih mynta ka sngi, ka la bthah ban pyniaid kali, tang 20 percent ha ka nongbah Shillong.

Ha katei ka hukum, la shah ia ki city bos, ki mini bus, ki local taksi bad ki auto rickshaw, ba kin iaid ha ka nongbah Shillong bad kumjuh ha ki khap sor, kum sha Mawpat, Mawlai bad Mylliem Block, ha kaba la buh por, ba kin iaid kamai, naduh ka por 6baje mynstep, haduh ka por 6baje janmiet.

Ha ka hukum, kaba ha ka 16tarik mynta u bnai, la shah ia ki kali, ba kin iaid haduh 30 percent ha Shillong bad 50 percent ha ki nongkyndong jong ka East Khasi hills District.

Ha ki jaka kiba hap ha Pynursla bad Sohra Civil Sub Division bad kumjuh ha Mawryngkneng, Mawkynrew, Mawsynram, Sohiong, Mawphlang, la bthah mynta ka sngi, ba ki kali, kin iaid tang 30percent, katba ha katei ka hukum, kaba 16tarik mynta u bnai, la shah ia ki kali, ba kin iaid ha kitei ki jaka haduh 50 percent.