Nang pynksan sa u heh Congress, ia ki ktien U Bah Bindo

Shillong, 12 Nohprah:
U nongialam ka Liang pyrshah ha KHADC u bah Manstudy Nongrem, u la ong ba u sngew iahap ia ki jingkren u bah Bindo M Lanong bad u kyrshan ruh ia katei ka jingkren jong u bah Bindo, uba la kren ha ka jingialang ialap elekshon jong ka seng UDP ha Muktapur kaba u la ong ba ka BJP dei ka seng kaba kwah ban pynkylla niam Hindu lut ia baroh nalor ka jingkhang jong ka ia ka jingbam doh masi.
“Nga kyrshan bad nga sngew iahap ia kitei ki jingkren u bah Bindo uwei na ki nongialam ka UDP, hynrei ngam sngewthuh ngam sngewthaw shuh pat ia ka nongrim ba ka UDP ka ieng namar ba u President rangbah jong ka u Dr.Donkupar Roy u ju kren ia shah ia ka seng BJP katba uwei pat u nongialam ba la rangbah katei ka seng u bah Bindo u kren pyrshah” ong u bah Manstudy.
“Kawei pat kaba ngam lah sngewthuh hangne ka long ba u nongialam ka UDP ( Bindo) u kren pyrshah BJP katba ka UDP pat ka la don lypa ha ka kynhun treilang bad ka seng BJP ha ka kynhun kaba ki ong ka NEDA, sa kawei pat ngi iohi ba hapoh District Council ruh ka UDP ka kyrshan ia ka Executive Committee kaba mynta kaba donlang ka seng BJP” u la ong biang.