Nang pynkhlain bha ka China, ia ki shipai jongka, hajan Arunachal

Ka khubor jong ka India Today, ka iathuh ba ka China, ka la nang pynkhlain tyngeh ia ki tup ki man bad ki shipai pahara jongka ha ki bynta kiba don ha syndah jong ka Arunachal Pradesh.

Katei ka khubor, ka pyni, lyngba ki dur ki dar, kiba lah ban iohi lyngba ka Google Earth bad kiwei de ki jingring dur, ba ka China, ka la pynkhlain bha ia ki pyrton shipai jongka, ha Nyingchi, ka nongbah, kaba hap ha ka Jylla Tibet, ha kaba ki don ar kynhun ki shipai ha katei ka nongbah. Ka Nyingchi, ka dei ka nongbah, kaba don ha ka thain Tuting, ha Upper Siang district jong ka Arunachal Pradesh.

Ka China, ka la tei ia ki kad liengsuin, ki jaka hiar helicopter, ki lynti rel bad ka surok kaba bha shibun, kaba pyn iasoh ia ka Nyingchi bad ka Lhasa bad ka la nang pynkhlain ruh ia lad pathai khubor, ba kin suk ki shipai jongka, ka People’s Liberation Army.

Lyngba ki dur, la iohi, ba ka kad liengsuin ha Nyingchi, la tep ha u snem 2004 bad la trei pyndep ha u snem 2006 bad ka don harud ka wah Brahmaputra, kaba don 15 Kilometre na u pud bad ka India.