Shillong: Ka jingriew spah ka thain Riwar ka la nang paw shuh shuh ha ka kam jngohkai pyrthei, hynrei wat la kiba bun kim pat lah ban pynwan dur ha ka rukom kaba janai ban khring ia ki nongjngohkai pyrthei.
Ha kane ka kynti, kawei pat ka shnong ha thain Riwar (Pynursla) kaba la lah ban ong ba kan dei kawei ka jaka jngohkai kaba don ki jingbuh bad jingthaw ka mariang ba itynnad, ka dei ka Shilliangjashar, kaba jngai tang kumba 13 km eiei na Pynursla.
Hapoh u pud u sam kane ka shnong, ki don ka jingkieng jri, u maw puri, krem mawblang, ki ksaid ba itynnad nalor kiwei ki jingitynnad ka mariang, ban khring ia ki nongwan jngohkai pyrthei.
Ia kine ki jaka jngohkai pyrthei la peit bad pynbha da ka Shilliangjashar Eco Tourism Cooperative Society lem bad ka jingiatreilang ka shnong.
Kane ka shnong ka don kumba 168 tnum iing bad 850 ngut eiei ki nongshong shnong, kiba kwah ban ithuh noh ia kane ka jaka kum ka jaka jngohkai pyrthei.
Na ka liang u rangbah shnong bah Seibor Khongthah, u la ong ba ki la bynshet ha ka Society ba kan pynbha ryngkat ka jingiatreilang bad ka shnong.
Ha ki bynta ka shnong, la don ka jingkieng jri kaba pynpur ha ka mawsiang ban iaid bri ki paidbah, ka don ka wah lykong, kaba iasyriem kum ka ksaid nohkali kai kaba lah ban peit ia ka wah lynder, bad harum kane, ka don ka jingkieng jri ban iaid ki nongleit bri leit lyngkha.
Ki nongshong shnong ki la shna ruh ia ka jingkieng siej ban jam sha ka shiliang shnong ka shnong Lyngnger, bad ia kane ka jingkieng siej, la ju shna man u snem ha u bnai Iaiong ban lait na ka jingeh ha ka por ba heh um.
Kine ki jaka jngohkai ki jngai kumba shiteng kynta eiei ban iaid na shnong.
Watla kim pat don kano kano ka jingiarap na ka sorkar, u Bah Super Khongsit u nongialam ka Society u la iathuh ba la thaw lai snem mynshwa bad la ioh register khyndiat bnai mynta.
“Ngi la iaid ka jingshna ia ki jaka iaid ki paidbah. Ngim pat ioh ka jingiarap na ka sorkar bad kyrmen ba nangne shakhmat kan phai khmat sha kane ka thain jong phi”, la ong u Bah Super.
Ki kwah ba ka shnong kan rung ha ka map ka jaka jngohkai ka jylla khnang ba ka shnong kan roi kan san lyngba ka jingwan ki nongjngohkai pyrthei.