Nang kiew stet, ka khlam covid ha ki ri ka pyrthei, jan 5 million kiba ioh pang thymmai

Ka World Health Organization (WHO), ka ioh jingkhein, ba ka khlam COVID-19, ka kiew stet bha ha kine ki sngi, ha ki ri bapher ka pyrthei, ha kaba ka jingkiew, ka long da 11% ha ka taiew ba ladep bad kiba bun eh, kiba ioh ia katei ka jingpang, ki dei ha ki ri America.

Katei ka tnat jong ka U.N, ka iathuh ba ki don haduh 4.99 million ngut, kiba ioh thymmai ia katei ka jingpang, haba khein naduh ka 20 haduh ka 26tarik Nohprah 2021. Ha Europe, ki don mar shiteng na kiba ioh pang, lane kaba long 2.84 million ngut bad katei ka jingpang, ka long da 304.6 ngut kiba ioh pang, na ki 100,000 ngut ki nongshong shnong jong ka Ri Europe.

Ka WHO, ka iathuh ba kiba ioh pang thymmai ha ki Ri America, ki kiew da 39 percent lane kaba long 1.48 million bad tang ha US, ka long da 1.18 million ngut, lane kaba long 34 percent kiba nang kiew. La iathuh ba kiba ioh pang thymmai ha Africa, ki kiew da 7percent lane kaba long 275,000 ngut.