Nang kiew kiba ioh pang khlam corona ha Assam, Manipur, Tripura

Sa 127 ngut ki don kiba ioh pang khlam coronavirus, hynnin ka sngi ha Assam bad baroh kiba ioh pang, ki la poi sha ka 2,115 ngut ha Assam.

Na kitei ki kynthup ia 38 ngut na Dhubri bad 4 ngut Darrang, 85 ngut ki dei na kiwei pat ki District, ong Himanta Biswa Sarma, myntri ka koit ka khiah ka sorkar Assam, hynnin ka miet. La iathuh shuh ba ki don sa 21 ngut na Barpeta District, 21 ngut na Tinsukia bad 14 ngut na Dima Hasao.

Ha Manipur, ki don sa 16ngut kiba ioh covid 19 ha ki 24 kynta ba ladep bad baroh kiba ioh pang, ki la poi sha ka 124ngut. Baroh kiba dang don katei ka jingpang ha katei ka jylla, ki long 86 ngut bad sa 38 ngut kiba la jem.

Na kitei ki 16 ngut, la iathuh ba ki don 13 ngut, ba kynthup ia 7ngut ki shynrang bad 6ngut ki kynthei, kiba shah sumar ha VRDL jong ka Jawaharlal Nehru Institute of Medical Sciences hynnin ka miet. Kitei ki 13 ngut, ki dei na Bishnupur, Chandel, Churachandpur, Kangpokpi, Tamenglong bad Tengnoupal district.

Ka Tripura, ka don 25 ngut kiba ioh pang hynnin ka sngi bad baroh kiba ioh pang, ki la poi baroh sha ka 647 ngut, ong U Biplab Kumar Deb, myntri rangbah ka Jylla.