Ki don sa lai ngut, kiba dang shu ioh pang thymmai ha Manipur bad mynta kiba ioh ia ka COVID19 ha ka Jylla, ki la poi sha ka 29ngut. La iathuh ba kitei ki lai ngut, ki dei kiba dang shu wan phai na shabar ka Jylla, ha kaba arngut ki wan phai na Delhi, uwei pat uba wan na Chennai.
U Dr. Khoirom Sasheekumar Mangang, additional director jong ka health department ka Manipur, u iathuh ba ki arngut, ki dei uba 19 bad uba 26 snem ka rta bad ki wan na Delhi, ha kaba ki shong ha la ki jong ki jong ki bos.
Kiba pang coronavirus ha Assam, ki la poi sha ka 346 ngut, da ka jingdon sa 17ngut kiba dang shu ioh pang ha ki 24 kynta ba ladep.
U Himanta Biswa Sarma, myntri ka koit ka khiah ka Assam, u iathuh ba kitei kiba dang shu ioh pang, ki dei kiba na Chirang, Tinsukia, Goalpara, Cachar, Hailakandi bad Tripura. La iathuh ba 4 ngut ki dei na Chirang, 4 na Tinsukia bad uwei na Goalpara district. Nangta ki don sa 8ngut kiwei pat kiba ioh pang, kiba don ha ka jingshah sumar ha Silchar Medical College & Hospital (SMCH) bad kitei ki dei 3 ngut na Cachar, 3ngut na Hailakandi bad 2nut na Tripura.
Haduh mynta, kiba don ia katei ka jingpang, ki long 282 ngut, ha kaba katei ka jingpang, ka la shim ia 4ngut ki jingim briew.
Ka Tripura, ka la nang kiew ka jingdon kiba pang COVID19 bad baroh kiba ioh pang, ki la poi sha ka 189 ngut ha katei ka Jylla. Kitei kiba ioh pang thymmai ki dei kiba wan da ka rel na Mumbai sha Agartala.
Na 996 ngut kiba la dep test, la lap ba ki don 16 ngut kiba don ia katei ka jingpang, ong U Biplab Kumar Deb, myntri rangbah ka Tripura hynnin ka sngi. Kumta da ka jingdon kitei ki 16 ngut kiba dang shu ioh ia katei ka jingpang, baroh kiba pang covid19 ha katei ka Jylla, ki la poi sha ka 189 ngut.
Phi don ban ong eiei?