Nang kiew ka khlam corona, poi sha ka 50hajar ngut ha ka shi sngi

Ka jingpang khlam coronavirus, ka la nang kiew bha ha India bad ha ka sngi balang, ka jingpang, ka la kiew sha ka 50,000 ngut bad katei ka jingkiew, ka dei ha ka sien, ba nyngkong, hadien jong ka 6tarik Naiwieng 2020.

Ha ka sngi balang, ki don 53,476 kiba ioh pang thymmai bad tang ha Maharashtra, ka jingpang, ka la kiew sha ka 31,855 bad kaba pyni, ba katei ka jingpang ka kiew bah ha katei ka jylla. Ka Mumbai bad ka Pune ruh ki kiew bha ha ka jingdon katei ka jingpang, ha ki khyndiat sngi ba ladep.

Ka Punjab, ka wan ba ar, ha ka jingbun ki nongpang, da ka jingdon jong ki 2,613 ngut kiba ioh pang thymmai hynnin ka sngi.

Mynta ki don 3.95lak ngut kiba dang don ha katei ka jingpang ha ka Ri hi baroh kawei bad kiba iap hynnin ka sngi, ki long 251 ngut.