Nang kiew ka khlam corona ha East Khasi Hills, 92 ngut ki paidbah mynta ka sngi

Shillong: Ka khlam corona, ka nang kiew stet ha East Khasi Hills bad mynta ka sngi, ka jingtip ba la ai da U Director of Health Services (MI), ka pyni ba kiba ioh pang thymmai, ki long 124 ngut bad ha East Khasi Hills, ki don 100ngut bad 92 ngut na kitei ki dei ki riew paidbah.

Ha Ribhoi District, ki don 7 ngut ki riew paidbah, kiba ioh pang thymmai.

Kiba la jem na ka jingpang, baroh ki long 199ngut bad na kitei ki kynthup ia 176 ngut tang ha East Khasi Hills bad ki riew paidbah, kiba la jem, ki long 135 ngut.

Mynta ka sngi don uwei uba iap na ka jingpang corona, ong shuh ka kyrwoh.

Kiba don ia ka jingpang, haduh mynta ki long 1,977ngut bad ha East Khasi Hills, ki don baroh 1,395, ha kaba ki riew paidbah, ki long 1,253 ngut; katba kiba la jem baroh ki long 3,058 ngut bad kiba iap baroh ki long 43 ngut.