Nang kiew ka khlam corona ha Assam, 598 ngut shisngi ha Guwahati

Sa 786 ngut ki don ki nongpang Covid ha Assam, hynnin ka sngi bad haba khein lang, ki la poi baroh sha ka 12,522 ngut baroh kiba ioh ia katei ka jingpang ha katei ka Jylla.

U Himanta Biswa Sarma, myntri ka koit ka khiah, u thoh ha ka twitter jongu, hynnin ka miet, ba na kitei kiba ioh pang, ki don 598 ngut tang na ka nongbah Guwahati. Haduh mynta, kito kiba dang shah sumar ki long 4,623 ngut.

Ha Tripura, ki don sa 112 ngut kiba ioh pang Covid 19 bad baroh kiba pang covid ha ka Jylla, ki la poi sha ka 1,693 ngut.

U Biplab Kumar Dev, myntri rangbah ka Tripura, u iathuh ba kitei ki kynthup ia 13 ngut kiba wan phai sha ka jylla da ka liengsuin, 20 ngut kiba don jingpang corona nalade, 28 ngut kiba ia kynduh bad kiba don jingpang lypa, 29 ngut kiba shong jngai ialade, 4 ngut ki nongtrei ka koit ka khiah, 2 ngut ki bym ju leit jingleit satia bad 17 ngut kiba shait leit jingleit shabar.