Ka khlam corona virus, ka la nang kiew wut wut ha India bad haduh mynta kiba ioh ia katei ka jingpang, ki la poi sha ka 2,56,611 ngut. Kiba dang shah sumar, ki long 1,25,381 ngut, kiba la jem, ki long 1,24,094 ngut bad 7,135 ngut kiba la iap. Kiba la jem na ka jingpang, ki long 48.37 percent, ong ka tnat ka koit ka khiah ka sorkar India.
Ha Assam, ki don sa 208 ngut kiba dang shu ioh ia katei ka jingpang bad baroh kiba la ioh ia ka jingpang ia bit, ki la poi sha ka 2,681 ngut bad kitei ki long 39 ngut na Hojai, 24 na Dhubri, 10 na Nagaon, 7 na Golaghat, 6 na Majuli, 5 na Lakhimpur bad uwei na Dhemaji nalor kiwei pat ki jaka.
Ka Maharashtra, ka don mynta ia 85,975 ngut ki nongpang, ka Tamil Nadu 30,152, ka Delhi 28,936, ka Gujarat 20,097 bad Rajasthan 10,599 bad ki dei ki san tylli ki jylla, kiba shah ktah jur ha katei ka khlam corona. Ka Uttar Pradesh bad ka Madhya Pradesh, ki la jan poi sha ka 10hajar ngut kiba ioh pang bad ka don ruh ka jing nang kiew ha West Bengal, ha kaba ki don 8, 187 ngut. Ka Haryana bad ka Jammu and Kashmir ruh ki la nang kiew wut shi wut.
Ka Maharashtra, da ka jingdon ki 3,007 ngut kiba dang shu ioh ia katei ka jingpang thymmai, ka la tam ia kaba don kiba ioh pang ha China, kiba long 83,036 COVID-19 bad kaba wan ha ka kyrdan ba 18 ha ka jingbun kiba ngat ia ka khlam corona ha ka pyrthei baroh kawei.
Phi don ban ong eiei?