Kiew ka khlam corona sha ka 2.26lak ha India, nang kiew jur ha ka nongbah Delhi

Ka jingdon kiba ioh pang ha India, ha ki 24 kynta ba ladep, ka long 9,851 ngut bad kiba iap, ki long 273 ngut.

Kiba ioh pang mynta ha ka Ri, ki long 2,26,770 bad kiba la jem, ki long 1,09,462 bad kiba iap ki long 6,348ngut. Ka India, ka hap mynta ha ka thup jong ki hynniew tylli ki Ri, kiba jur tam ha ka jing shah lynshop ha ka khlam corona virus ba kynthup ia ka US, Brazil, Russia, UK, Spain bad ka Italy.

Ka khlam corona, ka la kiew stet shibun ha ka nongbah Delhi. Ha ka 19tarik Jymmang 2020, ki don tang 10,554ngut kiba ioh pang, hynrei ha ka 5tarik Jylliew 2020, ki la poi sha ka 25,000 ngut kiba ioh pang lane kaba long antad, kumba 1,198ngut kiba ioh pang, hapdeng ka 28tarik Jymmang, haduh ka 3tarik Jylliew 2020, lait noh tang ha ka 1tarik Jylliew 2020, ha kaba ki don 1,000 ngut kiba ioh pang ha ka shi sngi.

Ha ka 3tarik Jylliew, ki don 1,513 ngut kiba ioh pang bad kaba dei ruh ka sngi, kaba bun tam kiba ioh pang covid ha ki ar bnai, ba katei ka jingpang, ka la trei ha Delhi.

Ka jingpang ha Delhi, la iohi, ba ka la nang kiew shuh shuh sha jrong bad ha ka 2tarik Jylliew, ka kiew haduh 6.26 percent, kaba palat ia ka jingkhein kaba long ha ka Ri hi baroh kawei.

Ha kine ki sngi, la iohi ruh ba ki don bun bah kiba ioh ia katei ka khlam, kynthup naduh ka tnat bar ri jong ka sorkar India, ka tnat iada ri, ka ophis jong U Lat bad sa shibun kiwei de ki tnat sorkar, kiba la shah ktah jur, na ka jing ioh pang kiba bun.