Nang ker sainar ka India, nang ioh leit rep bad thaw pung dohkha ki khar Bangla ha madan Lyngkhat

Shillong:Hynnin ka 1 tarik Risaw, 2023, U bah Kentli Tangsang, Sordar ka Raid Lyngkhat ha ryngkat samla Melajied Khongbuh, Asst Publicly KSU Sengkmie u ba long ruh u General Secretary KSU Nongtyngur Unit bad u bah Hillstar Ïawbor, Chairman ka Raid ki lah hiar biang sa shisien ban lur pynmadan biang ia ka Madan Kynjat Lyngkhat, kawei na ki madan ialehkai kaba pawnam bha kaba don ha syndah bad ka Bangladesh.

Ka madan photbol Lyngkhat, ka dei kaba la pawnam bha naduh hyndai hynthai bad khamtam hadien ba ka lah pynmih ruh ia u Aibor Khongjee, u pleiar phutbol uba mih iakhun na ka ri India, hynrei katei ka madan, ka la shah pynsniewdur lut, naduh ba ka sorkar ka lah pyntrei donbor da kaba pyniaid da ka surok jong ka kper sainar shiah na shiteng ki bynta katei ka madan phutbol Lyngkhat. Shuh shuh hadien ba ka sorkar India ka lah pynjot, na ka liang ki bor ka Bangladesh ruh ki lah wan kam trai da kaba rep ba riang bad haduh u pud ba kin ban tih pung dohkha bad ha kaba na ka liang ki BSF kim nud leh eiei.

Shuh shuh nalor ba katei ka madan phutbol ka lah shah pynjulot lut khoit, hynrei ka sorkar ka lah pynbeit ruh ban pyrhap jubor sha Bangladesh; hynrei na ka daw ka jingshimkhia ki kynhun bapher bapher, khamtam ka seng KSU ban pyrshah jur ia ka jingker sainar shiah jubor kumta katei ka kam ka lah shu sahteng noh, hynrei ka long kaba sngewkmen shibun ba ha ki khyndiat bnai ba lah dep na ka liang u sordar ka Raid Lyngkhat u lah leit lur hi ia katei ka madan wat hapdeng ka thma ktien kaba jur bad ki bor pahara ka sorkar Bangladesh bad tad haduh mynhynnin ka sngi ha kaba na ka liang u Sordar, u bah Kentli Tangsang, u la iathuh ba mynta, u lah ioh ia ka hukum ba u lah ban pyntrei suk ia katei ka surok, ha kaba la mynjur, da ki shipai pahara khappud na baroh ar tylli ki Ri, ba kynthup ia ki BSF bad ki BGB.