Nang jyllei ki longiing pra khiew ja ha ka jylla, ong ka Myntri

Shillong, 15 Naitung: 
Ka myntri sorkar jylla ba peit ia ka tnad Social Welfare ka Debo rah Marak  ka la ong ba ka jingdon jong ki longing ba pra khiew ja ki la nang bun ha kine ki sngi bad ki kam runar ba la leh da ki khynnah surok.
Ka jylla Meghalaya ka la nang kiew ia ki kam runar ba la mih na ki khynnah kiba im ha surok, bad ki longing ba pra khiew ja, bad bun na kine ki kam runar bal eh ki khynnah kiba kum na kine ki thymmei ki long ka tuh ka thiem, ka jing pyntieng, ka jingshoh jingdat bad kiwei”, la ong ka Marak haba kren ha ka workshop halor ka phang, “Ki hok jong ki khynnah, ka jingbishar hok (Care & Protection of Children) Act, 2000” kaba long hynne ha ka nongbah. Ban tem ia ki kam runar ba la leh da ki khynnah, ka myntri ka la ong ba ka long kaba donkam ia ki briew kiba don ha ka bor sorkar, bad ruh ka imlang sahlang. Ka jingiashim bynta jong ki paidbah ka long kaba donkam ban wanrah ia ka jingkylla ha ka imlang sahlang. Ha kane ka workshop la wan iashim bynta ki dkhot sengbhalang, ki heh sorkar na ki tnad bapher bapher na ki district ka jylla.
Ka Marak ka la ong ba ka jingiaid lynti bad ka jingkylla ka rukom im jong ki khynnah ka don shibun ki bynta ha kaba donkam ban ioh ka jingsawdong sawkun kiba biang ban pynlong ia ki khynnah ban heh ban san bha. “Ka dei ka hok jong man ki khynnah ban kha ha ka jaka kaba shngain bad khlem don kano kano ka jingpynwit bad ban heh ban san ha ka jinglong kaba biang bad kaba shngain”, ka la ong.
Ka jingiada ia ki khynnah ka long kaba donkam bad dei ban shim khia da baroh halor kane. Ka kyrmen ba ka jingiathir ha kane ka workshop kan wanrah ia ka jingmyntoi ban ai ban sam pat sha ka imlang sahlang.
Shwa ia kane, u Director ka Social Welfare Bah Hima M Shangliang u la iathuh ba la pynlong ia kane ka workshop ban pynsngewthuh ban ai jingshai ia ki dkhot jong ka Child Welfare Committee, Juvenile Justice Board, Special Juvenile Police Unit,  Print bad Electronic Media Child Care Institutions, District Programme Officers, District Social Welfare Officers, sengbhalang bad kiwei ki tnad ba peit ia ki hok bad jingshah thombor ki khynnah khnang ba kin lah ban trei ban ai ia ka jingshakri ha ka rukom kaba dei. La don bad ioh jingkren ruh na u P W Ingty u Principal Secretary ka Social Welfare, Commissioner & Secretary, Social Welfare.