Nang jur ka thma pyrshah pynkylla ia ka Khasi MIL

Shillong, 23 Naiwieng:
Ka thma ban pyr shah ia ka jingpynkylla ka MBOSE ia ka ktien Khasi MIL sha ka MIL optional ka la nang klang haba ka jingialang jong ki MDC ka KHADC bad ki kyn hun bad ki riew paidbah ha kane ka sngi ka Saitjain ka la rai ban thaw ia ka Komiti na ka bynta ban buddien bad ka sorkar ba ka dei ban pynneh ia ka ktien Khasi kum ka MIL compulsory.
Ha kane ka jing ialang kaba la wan u CEM Bah Adelbert Nongrum, u nongialamliangpyrahah Bah Pynshngain N Syiem ka la shim ia ka rai ban thaw ia ka komiti kaban khlieh hi da u CEM bad u secretary ban thung da u ophisar ka KHADC.
Ka jingthaw ia kane ka komiti ka long ban dawa na ka Sorkar jylla ban pynneh biang ia ka ktien Khasi kum ka sobjek ba dei ban shim baroh ki khynnah skul kiba dei ki Khasi ha ka Modern Indian Language ( MIL) ym ban shu jied namar ka la dep don lypa ka Elective Khasi ha Class- XI bad Class- XII.
Ym tang ia ka MIL, hynrei kane ka committee kan buh jingthoh ruh sha ka sorkar jylla ba ka dei ban kren ei ei hapoh ka sorkar India ban ithuh noh ia ka ktien Khasi ha ka 8th Schedule.
Ha ka jingialang ba long ha Ïingdorbar Jaiaw Shyiap bad Lumpyllon, ka jingialang ka la rai ban pyrshah jur ia ka jingpynkylla elective ia ka Khasi MIL da ka MbBOSE lyngba ka jingbthah ka sorkar jylla.
Nalor u CEM, la jied ia ki dkhot ka komiti kynthup ia ar ngut na ka Federation of Khasi States kynthup ia u Dr. Sylvanus Lamare, Prof. Streamlet Dkhar, Dr. Batjuban Kharlukhi na ka ( Khasi Author Society), Bah Pynshngaiñ N Syiem bad u Bah Banteidor Lyngdoh Mawphlang. U CEM u ong lada dang i donkam yn sa pynrung dkhot shuh shuh ha kane ka Komiti. Kane ka Komiti kan sdang ia ka jingtreikam naduh taiew ban wan.