Nang jur ka jing ia kynad ki MLA Congress

Shillong, 8 Risaw:
Wat la shipor, i kumba ka la don ka jing iasngew thuh jingmut hapoh ka seng Congress, hynrei ki tyllong khubor ki iathuh ba ka jingkhih phaloh ka saiñ pyrthei hapoh katei ka seng ka la sdang biang ha kine ki sngi napoh napoh tang hadien katto katne por ba la mih ka Aiñ pyrshah Ar maloi.
Kat kum ka khubor ba u Rupang u la ioh lum la ong ba ha kine ki khyndiat sngi ki ban wan u heh Congress na Delhi uba peit ia kane ka jylla u V.Naraya nasamy un wan ha nongbah Shillong ban pynbeit ia ki kynrum kynram bad ban ia kynduh ia ki MLA ka seng Congress, hynrei la ong pat ba ha katei ka jingwan utei u heh Congress kan ym long shuh tang ka jingiakren, hynrei kan dei beit ka jingpyni bor ia ka jingkhlain kiba ia shah Mukul bad kiba pyrshah Mukul ha kaba yn rai syndon hato yn shimti noh da kiwei pat ia ka kam nongialam ne yn pynneh hi ia u Dr.Mukul Sangma.
Haba wad jingtip halor katei ka kam, u Rupang u la ioh jingtip na ki katto katne ngut ki nongialam Congress, ha kaba ki la kam ba mynta ki MLA Congress kiba pyrshah ia u Dr.Mukul ki don hapdeng ka jingbun paid, hynrei kaba sah pat ka long ba kim lah ban ioh ia u nongialam uba biang u ban shimti ia ka kam Myntri Rangbah ha kaba la iathuh ruh ba kitei ki MLA mynta kim kwah shuh ba u bah DD Lapang un shim ia ka shuki myntri Rangbah hynrei ki kwah da uwei pat u nongialam. Ki lad khubor ki la iathuh ruh ba ia katei ka kynhun pyrshah Dr.Mukul yn ialam da u Ma Vincent Pala uba dei u MP katei ka seng na Shillong Konstitwensi.
U Ma Vincent Pala, wat la um dei satia, u dkhot jong ka dorbar Jylla, hynrei, u lah ban shimti ia ka shuki myntri rangbah, lada jia ba u ioh ia ka jingkyrshan jong kiba bun ki dkhot jong ka iing dorbar; tangba u dei ban ia khun elekshon noh hapoh hynriew, naduh ba u shimti ia katei ka shuki myntri rangbah bad ba un long u dkhot ba pura jong ka iing dorbar Jylla.