Nang jah rngai, ki bos sawkhmut, katba nang mih ki sngi

Shillong, 21 Nohprah:
Na ki 88 tylli ki bus saw sorkar ba la pyniaid da ka Synroplang Self Help Goup , ki don haduh kumba 30 tylli eiei, kiba shu shong ei namar ba kim lah iaid shuh ba la sniew.
Katkum ka jingtip ba la ioh, la iathuh ba kine ki bos saw Shillong Public Transport Service (SPTS) ki la hap ban shu shong ei ha jaka set, namar ba ki sniew bad shem shitom ban ioh ia ki tiar ban moramot ba hap thied nabar bad na kitei la iathuh ba ki don ki kali kiba la kham julor ka jngduh bad kim lah shuh ban shna.
La mih ka jingia kren sharum shaneng na ki paidbah, ba ki bos saw mynta ki la duna bha ban kamai, lehse dei na kane ka daw ba bun ki bos ba la sniew.
Katkum ka jingtip, bun ki briew khamtam mynta ki bnai tlang ki ia shim wai ia kine ki bos na ka bynta ban leit bam khana leit iaid kai.
Lada shim wai ia kine ki bos na bynta ban leit bam khana, ia ka dor la khein katkum ka jingjngai ka jaka ba ki leit.
Ki la iathuh ba ki jingduh jong ki kali kam lah shuh ban pynbha ia ki, namar ba ka sorkar ka buh tang 10 percent na ka bynta ban shna ia ki kali kiba sniew.
La iathuh ba ka jingmih kamai na kitei ki kali saw la iaphiah mar shiteng ka jingioh nong bad ka jingiateh bad ka synroplang bad tang 10 percent ka mang na ka bynta ka bai shna ia ki kali ba sniew.
Kham mynshwa ba ka sorkar ka la aiti lyngba ka Public Private Partnership (PPP) ha ka Synroplang bad kiwei ki kynhun ban pyniaid ia ki bos saw bad ki kali rit da kaba iasam ia ka jingioh lum bad ka sorkar mar shiteng. Katkum ka soskular ba ki la iateh bad ka sorkar, ka Group kin hap iasam mar shiteng na ka jingioh.
Hynrei kaba kham phylla, ka long ba ka sorkar kan shu shim suk beit ia ka bai kamai ka bai bhah na ki mar 50 percent katba ka Group kan hap ban peit ia ki jingdonkam baroh kum ka jingsiew ia ka bai nongtrei, ki nongniah bad kiwei ki jingdonkam.
katkum ka jingtip 10 percent na ka bai kamai ki thep na ka bynta ban shna ia ki kali saw. Ka Synroplang ka ioh ban pyniaid 88 tylli ki bos saw heh (SPTS) bad 120 tylli ki kali rit (SSPTS).
Na ki 120 tylli ki kali saw barit ne ki Shillong Supplementary Public Transport Services (SSPTS) ba la pyniaid da ka Synroplang, la iathuh ba 40 tylli ki la sniew.