NANG IAI BTENG KA PHLIM MeECL

Nga sngew kumba peit series Netflix haba nga pule ia ki khubor shaphang ka MeECL ha kine ki sngi bad ki taiew kiba lah leit noh. Ki jingiakhih, ki jingiadeng lama iong, ka jingiashah thngan jong ki engineers bad ki nongtrei MeECL bad ka jingdawa ban weng noh ia u Myntri ba dei ban khmih ia ka Tnad Bording bad kumjuh ruh ia ka/u CMD, MeECL ki dang iai bteng.

Mynta pat hadien ba u Arun Kumar Kembhavi, u Chairman-cum-Managing Director (CMD) jong ka MeECL u la leit jurip kyndit ïa kine ki karkhana ha ka 26 tarik, Kyllalyngkot, 2021, u lap ba ka don ka jingtuh bording kaba jur bha ha Byrnihat Industrial Estate ha kaba u la kam ba ki ophisar jong ka MeECL ruh ki ïadonkti lang.

Katkum ka khubor ba mih ha U Nongsain Hima ha ka 1 tarik u Iaiong, 2021, “Lap u CMD ïa ka buit ïasylla ki karkhana ha Byrnihat ban duhnong ka MeECL”, u la ong ruh ba katkum ka kyndon, dei ban kylliang ïa ki meter man la ka san snem ïa baroh naduh ki karkhana haduh ki longïing, hynrei ka long kaba lyngngoh ba ha kane ka jaka, la lap ba ki pyndonkam tang da ki juh ki meter haduh mynta naduh u snem 2004, watla katkum ka kyndon, dei ban kylliang ïa u meter shisien san snem.

Hadien ka jingkhmihthuh bad jingbishar bniah ia kine kiei kiei ki jingjia kiban dang iai jia, nga kwah buh ia kine ki jingkylli kumne harum:-

1. Hato kane ka jingleit jurip kyndit jong u CMD, ka long kaba bakla katkum ki kyndon jong ka Electricity Act ha kaba iadei bad ki Meter Connection?
2. Ka Ultimatum ba 14 sngi ba la ai da ki dkhot jong ka Meghalaya Energy Corporation Limited Engineers’ Association (MEA) ha kaba iadei bad ka jingweng noh ia u Myntri ba dei ban khmih ia ka Tnad Bording bad ia u CMD, MeECL; hato kane ka dei na ka bynta ban wanrah ia ka jingkylla ban pynbit pynbiang ia ka Corporation lane ka dei tang ban myntoi shimet ia ki katto katne ki riewshimet?
3. Hadien ka jingshah weng ka Kong Nikhla bad ba la thung CMD thymmai ia u Kembhavi, kine hi ki Engineers bad ki nongtrei MeECL ki lah ia kmen bad lah iaroh ruh namar ba ki lah ioh da u IAS officer; hynrei mynta pat ki dawa ban weng noh ia u. Hato ka dei namar ba u lah sdang tuklar bad pynthut ia ki da kaba u sdang ban trei hok bad kyndang ia ki kam bamsap jong ki?
4. Kum u CMD, u la leit ban jurip ba iohi ia ka jingiaid ki kam ki jam; hato kam dei ka kamram jong kine ki nongtrei ha ki jaka ba lah thung kam ia ki ban jurip bad khmih thuh ia ka jingtan bording ban nym don ka jingleh buit tuh?
   Ka jingiakynnoh iwei ia iwei, ka jingdawa hiar shuki lane ban weng ia ki briew ha ka bor, lehse kam dei ka jubab ban pynkhie im ia ka Tnad Bording ha ka Jylla. Pynban ka jingdonkam kaba kham kongsan mynta ka dei ka jingiatreilang ha baroh ki liang naduh kiba rit haduh ki longheh ha ki Department, bad lada ki dang ia sngewtynnad ha kane ki jingiatan tyllai, jingiakawang ktieh bad ia muja ia kyrsum hangta; ka dei ka Tnad bording kaba lah nang ngam jyllop. Peit mo lok! Ioh poi biang ka juk thang mombati, sharak bad dongmusa.

Pynshngain Lyndem,

Shillong – 793022,

Meghalaya.