Shillong, 12 Risaw:
Ha ka jingkylla ka sain pyrthei ha Khasi Hills Autonomous District Council (KHADC), ka UDP ka la rai ban iasoh bad ka liang synshar ka People Democratic Front (PDF) kaba ialam da ka Congress ha kaba u Bah Pynshngain N Syiem kum u Chief Executive Member (CEM).
Da kane ka jingleit iasoh ka UDP, ka jing khlain jong ka PDF ka la kiew sha ka 19 ngut ha ka iing kaba don 24 ngut ki MDC namar ka jingieh noh kam ki 6 ngut ki MDC.
Ki 6 ngut ki MLA kiba iehnoh ia ka ka MDC ki kynthup ia u Bah HDR Lyngdoh (MLA ka Sohiong),Bah Ardent Miller Basaiawmoit (MLA na Nongkrem), Bah Metbah Lyngdoh (MLA na Mairang), Bah Phlastingwell Pangniang (MLA na Rambrai Jyrngam), Bah Sanbor Shullai (MLA na South Shillong) bad Bah Brolding Nongsiej (MLA na Mawthadraishan).
‘Nga la ioh pdiang ia ka shithi ka UDP ban kyrshan ia ka PDF ba la phah da u nongialam ka UDP Parliamentary Party Bah Teiñwell Dkhar,” la ong u CEM ka KHADC Bah Pynshngaiñ ha kane ka sngi Nyngkong.
U la kubur ba ka jingwan iasoh ka UDP ka dei ka jingpynkhlain ia ka kynhun PDF.
”Nga kyntu ia baroh ki MDC ka KHNAM bad HSPDP ruh ba kin wan iasoh lang bad ka PDF”, la ong u Bah Syiem.
U CEM ka KHADC u la ong ba naduh bas dang, u la khot ia baroh ban don lang ha ka Executive Committee (EC).
”Nga sngew ba baroh ki MDC ki donkam ban iatylli na ka bynta ki dawbah ka district council. Nga sngew ba ka EC ka donkam ban don baroh ki party ha kane ka kynta ba donkam eh”, u la ong.
Lah ban kdew ba ka UDP bad ka KHNAM ki la mih noh na ka ARPA ka kynhun synrop liangpyrshah ha KHADC.
Ha ka jingshisha ki la ong ba kin don beit ha ka liang pyrshah hynrei ka UDP ka la kylla ktien da kaba iasnoh bad ka PDF.
Kham mynshwa u MDC ka Nongthymmai u Bah Latiplang Kharkongor u la ai ia ka jingkyrshan ia ka PDF.
Phi don ban ong eiei?