Nang bun kiba ai mukotduma, ia ka dawai injek covishield, namar ba ka pyniap bad pynioh jingpang ba bun jait

New Delhi: Ki kmie ki kpa jong kawei ka khynnah samla, kaba la iap noh, hadien ba ka ladep injek Covishield, ki la ai da ka mukotduma, pyrshah ia ka Serum Institute of India (SII) bad katei ka jingai mukotduma jongki, ka dei hadien ba katei ka kompeni, kaba na England, ka AstraZeneca, ka phla ha kashari, ba katei ka injekshon, ka lah ban pynmih ia kiwei pat ki jingpang ha ka met u briew, ha ki katto katne eh ki khep.

Ka Karunya, kaba dei ka khun kynthei jong U Venugopalan Govindan, ka la khlad noh ha u Naitung jong u snem 2021, hadien ba ka la dep injek da u dawai injek covishield. Ka komiti jong ka sorkar, kaba la thaw kyrpang, ka kyntait ban pdiang ia katei ka jingujor jong u kpa, namar ba ki shim, ba kim don ia ki sabut kiba biang, ban kynnoh pyrshah ia ka injekshon covishield.

U Govindan, u la mudui da ka mukotduma, ha kaba u dawa bailutksan halor katei ka jingjia bad u dawa ruh ban thung da ka komiti kaba kyrpang, ban tohkit halor ka jingiap jong ka khun kynthei jongu.

Sa kawei pat ka jingjia, la iathuh ba ka Rithaika Sri Omtri, kaba don 18 snem ka rta, ka dang shu pyndep ia ka Class 12 jongka bad ka dang leit ban pule ia ka lain architecture, ha ka por jong ka jingpang khlam covid ha u snem 2021. Ha u jymmang jong utei u snem, ka la dep ban injek, ha ka sien nyngkong bad hadien hynniew sngi, ka ioh ia ka jingpang khieshoh kaba jur, ka sdang ban prie bad kam lah ban iaid bad haba la eksamin, la lap ba ka don ka jingpang ha ka jingiaid jong ka snam lane kaba ki ong multiple blood clots bad haemorrhage bad tang hapoh ar taiew, ka la khlad noh.

Ki kmie ki kpa jongka, kim tip satia ia ka daw jong ka jingiap jongka, hynrei, haba ki wan jingtip, lyngba ka RTI, ki lap ba ka jingiap jongka, ka dei na ka daw jong ka injekshon covid bad ka jingktah ha ka met jongka, hadien katei ka injek.

Nangta sa U Jamie Scott, ula ai mukotduma ha UK, na ka daw, ba u ioh ia ka jingpang jabieng, hadien ka jingleh ia ka injek ha U Iaiong 2021.

Katei ka dawai injek, kim shym la pyndonkam shuh ha kine ki sngi ha UK bad ki don ruh kiba lap, ba katei ka injekshon kam dei satia kaba iarap ban pynduh ia ka jingpang covid 19.