Namar ka khlam covid Omicron, hap deng mask biang ha UK, ka Omicron ka rung ha ki jaka shong ka protein, ong u heh ka AIIMS

Naduh ka sngi hat majai, ka Ri United Kingdom, kan sdang ban pyn trei kam biang ia ka kyndon deng mask, ha ki dukan bad ha ki jaka iaid paidbah, na ka jingwan ka khlam covid kaba thymmai, ong U Sajid Javid, Secretary ka koit ka khiah ka sorkar England.

Ka England, ka syier mynsiem jur ha kine ki sngi, na ka jing wan poi ka khlam covid kaba thymmai, ka Omicron, ha kaba ki la don 2ngut kiba ioh ia katei ka jingpang ha UK, haduh mynta.

Ha India, U Dr Randeep Guelria, uba dei u heh duh ka AIIMS, u iathuh ba ka jingpang khlam covid ba thymmai, lane ka Omicron, ka dei kaba lah ban kylla haduh 30 jait ha ki bynta jong ka met ba ka don ka protein bad kumta, ka la dei ka por, ia ki stad kiba sumar ia ka khlam covid, ba kin peit bha, ia ka rukom ai dawai iada ia katei ka khlam, lyngba ka injekshon. La iathuh ba ka dei na kitei ki bynta ba ka shong ka protein, ba katei ka jingpang, ka sdang ban ia bit bad rung sha ka met jong u briew.

Katei ka jait jingpang, kaba jubor bha, ka la sdang pur mynta sha ki ri bapher jong ka pyrthei, ong ka khubor jong ka World Health Organization (WHO), ha kaba ka la sdang pur na South Africa, ha ka 24tarik Naiwieng 2021 bad hadien kata, ka la pur sha Botswana, Belgium, Hong Kong bad Israel nalor kiwei pat ki Ri.