Namar ka jingsniew palat ka surok, iakynduh S.E ka KSU Nongthliew Circle

Shillong: Mynta ka sngi ka 06 tarik Naitung 2021, ka Khasi Students’ Union Nongthliew Circle, ha ka jingialam u Bah Meaning Pathaw, President ka KSU Nongthliew Circle, ka leit ban iakynduh ia u Superintendent Engineer, PWD (R) Eastern Cicle ha kaba iadei bad ka jingsniew palat kane ka surok Mawmaram-Nongthliew-Mawlyndep-Umsaw Roads kaba ki paidbah nongshnong kiba iaid na kane ka surok ki la ud bad nam ia ka jingsniew bad shem jynjar ka leit ka wan kumjuh ruh ka la shim ia ka por ba kordor ban iaid na kane ka surok. Kane ka surok la mang 64.12 cr bad ka jingjrong 41.5 km na ka bynta ban pyntrei ban siang rong.

Ha kane ka jingiakynduh U Superintendent Engineer, u la pynpaw ba ka daw ka long ba sa slem pyntrei ia kane ka surok ka dei namar ka jingtreikam kane ka jingkhangdam covid-1919 bad ruh u la pynpaw ba un phah pyntrei noh kham kloi ia kane ka surok. Kumta, na ka liang ka KSU Nongthliew ka la pynsngew sha u bad kumjuh ruh ka kyntu ia ka ophis S.E.Eastern Circle PWD (R) bad ia ka ophis Executive Engineer, Shillong South Division PWD (R) , E.E. Shillong South Division bad kumjuh ia u Contractor ba dei ban pyntrei ia kane ka surok ba pyntrei noh kham kloi katba lah ia kane ka surok khnang ba ka leit ka wan ki nongleit kan long kaba kham suk.