Namar ka jingialang paidbah ha ka 5tarik, iakren ka KAS, MEPA

Shillong,27 Iaiong:
Kum shi bynta jong ka jingpynkhreh ia ka jingialang ban pynshai paidbah halor ka ktien Khasi, ha ka 5tarik Jymmang 2017, mynta ka sngi, ki nongialam jong ka Khasi Authors Society (KAS), ki la ia kynduh bad ki nongialam jong ka Meghalaya Editors & Publishers Association (MEPA), ha kaba ki nongialam jong ka KAS, ki pan ia ka jingkyrshan jong ki nongthoh kotkhubor, ha kaba ia trei lem na ka bynta ban pynlong ia katei ka jingialang kaba jop bad ba kin ai jingmut lang ruh, ban nang pynkhraw bad pynkordor ia ka thoh ha ka ktien Khasi.
Ha katei ka sngi, kan don ruh ka jingiaid pyneh rngiew ia ka ka ktien Khasi na iing dorbar Shnong Jaiaw Shyiap sha Madan Student, Jaiaw. U Kongsan, ha katei ka sngi, un dei U Paiem Phylla Sing Syiem, Syiem Hima Nongstoin.
Ha ka jingialang, ba la mihkhmat da U Dr DRL Nonglait President jong ka KAS lem bad U bah Phrikshon Kharshiing General Secretery, la don ruh U bah RM Shabong President bad Bah Philip Marwein General Secretery jong ka MEPA lem bad kiwei de ki dkhot na ki ar tylli ki seng.
Ka MEPA, ka la tyrwa ba kan ia trei lang bad ka seng ki nongthoh kot khasi, na ka bynta ban ioh ia ka jing ithuh ia ka ktien Khasi, ha ka khyrnit jong ka 8th Schedule bad kumjuh ruh ban ioh ia ka jing ithuh ia ka ktien Khasi ha ki ophis jong ka sorkar Jylla.