Namar ka ILP, yn pynbna prokram iakhih ki Sengbhalang Lashai yn buh sngi, ia ka jingialang paidbah ha Shillong

Shillong, 6 Nailar:
Ka kynhun jong ki sengbhalang bapher, kan iakynduh ha ka 8tarik mynta u bnai, ha ka por 2baje nohsngi, ha ophis jong ka Khasi Students Union.
U bah Joe Mar wein, uba dei u nongialam jong ka FKJGP bad uba dei u lamphang jong ka kynhun ki sengbhalang, ula iathuh ba ha katei ka sngi, yn iakren halor ka mat jingdawa jong ki sengbhalang, na ka bynta ban pyntreikam noh ia ka Inner line Permit bad ban buh sngi ruh ia ka jingia lang paidbah ha Shillong.
Ha katei ka jingia lang paidbah, la sngew thuh ba ki sengbhalang, kin shim ia ki rai jingiakhih, na ka bynta ban pynbor ia ka sorkar, ban pyntreikam noh ia ka ain Inner Line permit ha ka Jylla.
Ha ki khyndiat taiew ba ladep, ki sengbhalang, ki la leit sha ki nongbah bapher jong ki District bad ki Civil Sub Division ruh kumjuh, ha kaba ki la pynlong ia ki jingialang paidbah, ban pynsngewthuh ia ki paidbah halor ka mat jong ka ILP bad kaba dang sah mynta, ka long ba kin pynlong sa ha ka nongbah Shillong.
“Ngi la sngew diaw ba u Myntri Rangbah u Dr Mukul Sangma um bat ia ka kyntien jongu ban pyntreikam ia ka jingai jingmut ka High Level Committee (HLC) da ka ILP,” la ong u Bah Joe.