Nongpoh:Hynnin ka sngi, ki paidbah nongshong shnong ka Lamalong, ka shnong kaba don ha ki thain Mawhati ha Ri Bhoi, ki la leit ban tur sha ophis u Deputy Commissioner ka Ri Bhoi, halor ka jingkynnoh, ba ka la don ka jingpyndonkam bakla ia ka pisa kaba dei ban ioh jingmyntoi ia ki paidbah bad kaba la tip kum ka skhim Pradhan Mantri Krishi Sinchayee Yojana (WDC-PMKSY 2.0).
Lyngba jong katei ka sngi, ba ki la leit ban kynduh ia u DC Ri Bhoi, na ka liang ki paidbah na katei ka shnong, ki la leit syndon ban aiti syndon da ka shithi ujor ban dawa tohkit halor ka jingkynnoh ba pyndonkam bakla ia katei ka skhim ba ki nongioh jingmyntoi kim shym la ioh jingmyntoi satia kumba la mang da ka sorkar.
Kitei ki nongshong shnong, ki la iathuh ba ki la tip halor kane ka jingpyndonkam bakla ia katei ka skhim, ka dei hadien ba la don kiba ujor da ka RTI bad ki la ioh jingtip ruh ba la dep ban sei ia ka pisa haduh T. 1.41 klur, katba ki nongioh jingmyntoi pat kim ioh satia kumba la mang da ka sorkar.
Ki la iathuh ruh ba kane ka skhim ka dei ka skhim kaba ka sorkar kmie ka iarap na ka bynta ki nongrep ban kyntiew ia ka kam rep ka kam riang, ka jaka tan um, ki tiar ki tar ban rep ban riang, ki kam thain ksai bad kiwei kiwei, bad kaba ki nongshong shnong pat ki la kynnoh ba ka don ka jingpyndonkam bakla ne bam sap ia kane ka skhim.
Shuh shuh, ki la ong ba ki khmih lynti ba u Deputy Commissioner ka Ri Bhoi un shim khia ia kane ka kam ban tohkit na ka tnad treikam bad na katei ka Watershed Committee bad lada u Deputy Commissioner um shim khia kim banse ban iaid da kawei ka lynti wat ban tur ruh sha Secretariat ban dawa ia la ka hok, ki la bynrap.
Haba iadei bad katei ka jingshah kynnoh pyndonkam bakla ia katei ka skhim, u Deputy Commissioner ka Ri Bhoi, u Abhilash Baranwal, u la iathuh ba la don ki nonghsong shnong kiba wan ban ujor sha ka ophis jong u, ba ka don ka jingbym ia hap ia ka jingioh jingmyntoi bad ka pisa kaba ki dei ban ioh bad kum u khliehduh ka District u la kular ruh ban shim khia ia kane ka kam, wat lada dei ban tohkit ne thung da ka kynhun tohkit ban lap ia ka jingshisha kumba la kynnoh da kitei ki nongshong shnong ne ki nongioh jingmyntoi lyngba katei ka skhim.
Phi don ban ong eiei?