Namar ba ka pop ka man bun

AIS SUJA

“Namar ba ka pop ka man bun, ka jingieit kiba bun ka man khriat”. Kane kadei ka jingong jong u Jisu. Mathaios 24:12.

Haba ka pop ka bun ha ki briew, ka jingiaieit pat ka duna. Ka jingbishni jingiashun, jingieit tang ialade, jingia knieh bad kiba kumkita ki pyllong ka pop. Te haba ka pop ka bun hangno pat kata ka mynsiem jingiaieit? Namar ba kata ka jingieit ka la kylla khongpong sha ka pop.

Ngi iohi dala ki khmat ha kine ki sngi ba ka jingiaieit parabriew kala nangduh la ha sor ne ha nongkyndong, ha ka imlang sahlang, ha ka synshar khaddar ne ha ki ing ki sem. Kadaw ka long ka jingtrei donbor jongka pop ha u briew. Teng teng u briew u sngewba ki jingleh jong u ki bha kamlong pop, hynrei baroh kaba u briew u leh ha kine ki sngi ki long tang ka jingmyntoi ialade shimet, ymdon shuh uba don jingsngew iakiwei pat. Biang ialade kiwei mat dep shato. Kane ka mih na ki daw ka jingtrei donbor jongka pop kein.

Ka ktien u Blei ka ong – “kum baka long ha ki sngi u Noah, kumta ruh kin long kita ki sngi ha shwa ka jingwan u khun u briew (Jisu). Kumno la long ha kita ki sngi u Noah? Ki briew ki iabam ia dih (dihkiad), ia shongkurim, ia pynshong kurim”. Mathaios 24:37-38. Hangne ngi iohi ia kata ka mynsiem jingiaieit ia burom kam don shuh. Bad kata ka jingjia mynta ha kane ka pateng kaba lalong shisha kum ki por u Noah. Ki briew kim sngewpher ban iabam ia dih, ki briew kim sngewpher ban ia ioh kurim matah madei, ioh kurim bad ia phet kurim wat haba ki ladon la ki khun ki kti.

Ki briew ki leh ia kiei kiei tang ban pynsngewbha ialade. Leh awria pynsngewbha ia ka met. Dih ki jingdih ba pynbuaid, sngewbha ruh dih sngew sih ruh dih. Bad ka la long kaba sngewlehrain ruh ban tip ba ki bun ki nongdih ha ka jylla bad ha ka Ri bad ha ka pyrthei ruh kaba mynta. Bunsien ki sorkar ki juh ioh khajna kaba heh na ki kam iabam iadih wat ka jylla jongngi ruh haduh ba ka la mih ka jingleit tyrwa kiad ha ki ing (home delivery).

Hato kimdei mo kine ki long ki sngi ba khadduh? Kimdei mo kita ki sngi kiba la long kum ha ki sngi u Noah? Ngi tip ba hashwa ba u Blei un pynjot ia ka pyrthei ha kito ki por, ki briew ki laleh ia kine ki jait pop. Te kumta ruh ka la long mynta, ha shwa ba u Jisu un wan pat sha kane ka Pyrthei (kan long ruh ha kata ka por ka jingwan u khun u briew kamut ha shwa ba u Jisu un wan pat) Mathaios 24:37.

Kine kiei kiei, ki dei ban jia bad ymlah ban pyndam ia ki. Mathaios 24:6. Yn pyndep iaki jingthoh baroh jong ka ktien u Blei ha shwa ba u Jisu un wan sha kane ka pyrthei. Ka pyrthei ka la nangsniew ki jingjia la nang iai jia. La pyndep ia ki jingthoh ka ktien u Blei. Namar kata – “Uta u bymhok to nangleh bymhok: uta u ba tngit te un nangtngit: uta u ba hok te un nangleh hok: uta u ba khuid to un nangkhuid”. Jingpynpaw 22:11. To u briew un bishar ialade hashwa ba u Blei un bishar ia u, namar ba “ka pop ka man bun”.