Shillong: Myn hynnin ka sngi, u myntri ka tnad ka koit ka khiah ka jylla u bah AL Hek u la ong ba ka jylla Meghalaya kaba la pawnam lypa na ka jingioh ia u slap ba jur tam ha ka pyrthei, kan sa pawnam sa ka jaka sumar kynbat kaba pawnam tam ha ka pyrthei.
“Ngi la pawnam ha ka jingjur u slap tam ha ka pyrthei, mynta ngi donkam ban pynlong ia ka Meghalaya kaba pawnam tam ha ka pyrthei sa ha ka jingsumar dawai kynbat”, la ong u bah Hek haba kren ha ka jingialang sam syrnot sha ki nongsumar kynbat kaba long mynta ka sngi ha State Central Library Shillong.
U la iathuh ba mynta ka sorkar ka la iaid ha ka jingshna ia ar tylli ki jaka sumar AYUSH, kawei ha Sohra bad kawei ha Ri-Bhoi. “Ngi kwah ban pynlong ia ka Meghalaya kum ka jylla ki lad sumar ba pawnam”, u la bynrap.
Mynta ka sngi, ki don 584 ngut ki nongsumar kynbat na kylleng ka jylla, kiba la ioh ia ka syrnot kum ki doktor na ka North East Christian University (CECU) Nagaland, kaba dei ka skulbah kaba la ai bor ban ai syrnot ia ki nongsumar kynbat.
Ka Bio-Resources Development Centre (BRDC) ka sorkar Meghalaya ka la pynlong ia ka jingai jinghikai ban pyntbit pynjanai ia ki rukom sumar kynbat lyngba ka jingkyrshan ka Tribal Affairs ka sorkar India hapoh ka artikil 275(1).
Haba pynpaw ba u dei uwei na ki nongkyrshan radbah ia ka rukom sumar kynbat, u bah Hek u la iathuh ba i mei jongu I la pang haduh 7 snem bad baroh kine ki snem la shim dawai, shah sumar na ki doktor sorkar, hynrei khlem ioh satia ka jingkoit. Hynrei dei tad hadien ba la ioh ia ka jingsumar da ka dawai Kynbat na uwei u rangbah uba khot u bah King ba sah ha Riatsamthiah ba tang da u kynbat ba 10 tyngka, I la ioh biang ia ka jingkoit jingkhiah bad mynta I la khlaiñ bha.
Hynrei ha kajuh ka por, u la ong ba ka donkam ia ki nongsumar kynbat ban don ne khlehlang bad ka jingstad mynta khnang ban long kaba tbit bad kaba paka.
“Ngi donkam ban iakhleh lang ia ka jingstad sumar bad ka jingstad mynta ban lait na kano kano ka jingma bad ka donkam ruh ban long ka lad kamai ia ki nongsumar khnang ban lah ban pyndap ia ka iing ka sem”, la ong u bah Hek.
U la kyntu ba dei ban don ka seng jong kine ki nongsumar kynbat khnang ba kin lah ban trei kam ha ka rukom kaba dei.
Ha kane ka sngi, u bah Hek u la sam ruh ia ki mashin tyllait kynbat, ki jingthad sngi bad ka pisa sha kine ki nongsumar kynbat kiba la dep ban ioh ia ka jinghikai bad ka syrnot. La don lang u Pravin Bakshi, Secretary ka tnad ka koit ka khiah uba long ruh u Director AYUSH, u Bah C V Diengdoh u Joint Secretary bad u Member Secretary ka Bio Resources Development Centre (BDRC), Dr. D. Roy, Adviser ka Quality Council of India (QCI), New Delhi, Prof. D Khating u Vice Chancellor ka North East Christian University bad kiwei.