Shillong: Ka Khasi Students Union (KSU) Laban Circle ka la byrthen ba katba ka sorkar ka nang pynslem ban kyndang ia ki briew kiba la kynnoh basah beain ha Maxwelton Estate, ka seng ruh kan nang bteng ban shna iing ban khot wan sah ia ki para Khasi.
Ia kane la ong u President ka KSU Laban Circle u bah Rueben Najiar hadien ba la iakynduh bad ka ka Deputy Commissioner mynta ka 29 tarik Rymphang 2024. U la ong ba katba ka ka sorkar ka dang pynslem ban beh ia ki briew kiba sah ha katei ka jaka, kaba heh kumba 7 akar tam eiei jong ka sorkar, ka seng kan nang shna iing man ka taiew.
U bah Rueben u la iathuh ba ka DC ka la pyntip ba ka sorkar kam pat lah ban leh eiei namar ba katei ka jaka dang don ha kti ka Kashari bad kam lah ban leh mar mar. “Katba ka sorkar ka dang pynslem ban beh ia ki briew kiba sah beain, ka seng ruh kan bteng ban shna iing man ka taiew ban khot wanrah ia ki para Khasi”, la ong u bah Rueben.
U la kynnoh ba, ha ka jingshisha ka seng ka sngewthuh ba ka sorkar kam lah ban leh mar mar namar ba ka don ka kam mukotduma ha ki katto katne ki jaka bad ka don ka jingiaknieh jong ki kynhun, hynrei kumno ki briew ha katei ka jaka sorkar nalor ba ki sah beain ha katei ka jaka sorkar, ki ioh ruh ia ka EPIC, bad ban ri jingri kum ki masi ha jaka sor.
Ka KSU kala kynnoh ba ki don bun tylli ki iing ba shu shna beain ha kane ka Estate, kiba la shna khlem ka jingbit ne ka jingmynjur jong ka Dorbar Shnong, Kenches Trace, Oxford Rilbong lane kino kino ki bor ba dei khmih.
Katkum ka jingiathuh u bah Rueben, ka DC ka la kular ba ia kito kiba ri jingri kiba pyntuid ia ki jaboh, ki dei ban phah sangeh noh lyngba ka Municipal.
U la kam, ba kaba lyngngoh ka long ba ka sorkar jylla lyngba ka tnad Revenue kam don jingtip eiei katno ngut ki briew kiba sah ha katei ka jaka sorkar bad mano ba ai bor ia ki. Ula buh jingkylli ruh mano ba pynioh EPIC ia kitei ki briew khlem ka jingtip ka dorbar shnong.
Lah ban kdew ba mynta ka step, ka KSU ka la mih ban shna ia ki iing sah briew ha katei ka jaka hadien ba ka jingbuh por ia ka sorkar 15 sngi ka la kut ban kyndang ia ki briew kiba sah ha katei ka jaka.
tharai lada ioh EPIC u khasi khlem jingbit ka shnong wut2 ki paradoh ruh kin pynbna beh shnong..Balei um don mano2 ban kyrshan para rangbah shnong….shano kita ki synjuk ki rangbah shnong?
money talks ,crap works.