Nalor ka transit camp, tei ka Assam ia ki hotel ha Khanapara, ong U EM KHADC

Shillong:Ka mat jing iatai, ba la wanrah da u MDC ka Mawhati Constituency, u bah Charles Marngar, hapoh ka ingdorbar mang tyngka jong ka KHADC halor ka jingshna ka Assam, ia ka Transit Camp hapoh u pud u sam jong ka jylla Meghalaya.

Na ka liang u EM incharge ka Elaka u bah Jambor War, u la jubab ba ka mat khappud ka dei ka mat jong ka sorkar jylla, hynrei kine ki mat ki dei ki mat kaba ktah ia ka raid bad ka Hima bad ki shnong ki ba don ha poh u pud u sam ka KHADC.
U EM u la iathuh ba na ka liang ka KHADC ka la ioh jingtip halor ka jingtei jong ka Assam ha ka 20tarik u Risaw ha kaba u local MDC u bah Victor Ranee u la wanrah ia kane ka mat hapoh ka jingialang jong ka Excutive Commitee,ha kaba ka EC ka la bynshet ia kane kam ha u EM incharge ka Elaka.

U bah War u la ong ruh ba kane ka jingtei ka Assam ia ka transit camp ha Khanapara ka dei naduh u bnai Lber 2019 ha ka ba u EM Elaka, u la leit ban jurip ha ka 9 tarik Naiwieng ia kane ka jingtei jong ka sorkar Assam ha kaba ki la lap ruh ba ym tang ka transit camp, hynrei ki don ruh ki jingtei ia ki hotel baheh ha kine ki jaka. Ula iathuh ruh ba ha ka 12/11/20 ki la khot hajir ia U Acting syiem ka Hima Mylliem, u Syiem ka raid marwet bad ia u rangbah shnong ka Khanapara ha kaba kine laingut ki khlieh nongsynshar ki la iathir bad rai ba kine 3 ngut kin ai ia ka jingujor ha ka EC halor ka jingkyntur pud ka jylla Assam.

U EM, u la iathuh ruh ba la District Council ka la shim ruh ia ka rai ban thoh sha ka Deputy Commissioner ka Ri Bhoi Distirct ban phah sangeh mardor ia ka ne ka jingtrei,ha kaba ka DC Ri Bhoi ka la ioh pdiang ia kane ka shithi ha ka 20/11/20.
“Ka District Council ka la thoh ruh sha u Chief secretary jong ka Assam sha u Commissioner jong ka Transport Assam, sha u Deputy Commissioner jong ka Kamrup bad sha u DGP ka jylla Assam ban pynsangeh noh ia kane ka jingtei, katba ym pat lah pynbeit ia u pud u sam” jubab u bah War.

U bah Jambor u la iathuh ba halor ka jingwan kyntur pud ka jylla Assam ka EC ka la dep ruh ban pyntip sha ka sorkar jylla ban kyntu ban tuklar lang, halor kane ka bynta bad haduh mynta ka EC ka dang ap ia ka jubab na ka liang jong ka sorkar Assam halor kane ka bynta. U la ong shuh, ba ka EC ka don ka jingkitkhlieh ia ka mat ha kaba iadei bad u pud u sam ha kaba na ka liang ka EC ka shim khia ia kane k amat ha kaba kan iaid ha ka lynti jong ka ain, ha kaba iadei bad kane ka bynta.