Nalor ka rwai, sa ka put Muin ha ka Tamasa Monolith

Shillong,25 Risaw:
Na kylleng ki hima ka ri-Khasi ki la wan ban pyni ia ka sap rwai bad ka sap shad tynrai mynta ka sngi ha ka Tamasa Monolith ha Mawphlang, ki la don ki shad mastieh, ki shad puh lyngkha, shad pliang, ka kynheh ki nong Sohbar, ka shad dung khohner, ka shad wait bad kiwei. Ka la don ka rwai na ki sur nylla ka Hima Sohra, ka Pynter Orchestra, ka Hima Khyrim bad ka shad kiew ing ka Raid Mawja.
Nalor kiba bun ki jingia shim bynta katei ka Tamasa ba la wan ban pyni da ki Hima bapher bapher kaba ym kham ju iohi koit ha kine ki sngi mynta ka dei ka put Muin, la pyni ia katei ka put muin da ki katto katne ngut ki longkmie na ki thain Bhoi.
Haba ia kren bad i kong Jai Makrih, iwei na ki nongput Muin na ka shnong Phambir, thain Nongpoh Ri-Bhoi i la ong ba la ju pyndonkam ia katei ka put Muin ha ki ing iap briew, haba ia shongkai bad ha kino kino kip or ba ki shu kwah put sngew tynnad.
Ka put Muin ka dei ka kynja jingput kaba ki teh da u ksai ia u kynja siej rit uba la shna kyrpang bad ki put na shyntur ryngkat ka jingtan ia uto u ksai uba teh ha i siej rit ba kan wan sur.