Nalor ka ioh duna tulop, duh sa ka ding ilektrik ha MCCL

Shillong:Ka Sorkar Jylla nalor ba ka pyllait tang khyndiat ka tulop na ka bynta ki nongtrei ka Mawmluh Cherra Cement Limited (MCCL), mynta ka la ot syndon ia ka bor ding elektrik ha katei ka karkhana pynmih dewbilat bad ktah lut ia ki ïing sah (quarter) jong ki nongtrei.

Kine ki ba la mad jingeh, na ka daw ka jingduh bor ding elektrik ha katei ka karkhana ki la pynpaw ka jingbitar namar ka la dei sa ka por long skul bad don eksam sa ki khun ki kti. “Ka long kaei kaei ka jinglehbein ia ki nongtrei ka MCCL”, ong kiba sah ha katei ka jaka ba la mang ban sah ki nongtrei ka MCCL.

Ha kaba ia dei bad kane, kiba mad jingeh ki la pynsngew sha u Bah Titos W Chyne, CEM ka KHADC uba dei ruh u MDC ka Sohra Constituency, ban ia kren bad kyntu lem ia ka Sorkar ba kan ym leh beiñ ia ki nongtrei ka MCCL kaba ktah wat ia ka pule puthi ki khun ki kti jong ki nongtrei kane ka karkhana.

“Nga kyntu ia ka Sorkar Jylla bad ia ka tnad pynmih bor ding elektrik ba kan shim khia ia kane ka jingeh kaba ki nongtrei ki ia kynduh. Nalor ba ka tulop shu pyllait malu mala mynta sa ka pynlip bor ding elektrik. Kaei ka jingmut ka Sorkar Jylla halor kane ?”, la ong u Bah Titos.

Kum ban shu kdew ba ka Sorkar Jylla, ka la kyntu ia ka Hima Sohra bad Elaka Mawmluh ban peit bniah ia ka jingtyrwa ka Sorkar ban pynrung Joint Venture noh ha ka MCCL khnang ban pynkhie im biang ia kane ka karkhana.

Hynrei kumba long mynta kane ka kam ka dang sah ha ka umdum bad ki nongialam ka Hima Sohra bad Elaka Mawmluh ki la pynpaw ba kam pat don kano kano ka jingkhot na ka Sorkar ban ia kren halor ka MCCL.