Naduh sngi nyngkong, yn plie ia ki dukan ha Iewduh, ym pat shah dukan die doh, dohkha, die kwai, die jhur

Shillong: U symbud myntri rangbah ka jylla u bah Prestone Tynsong, mynta ka sngi u iathuh ba ka sorkar jylla ka la shah ban plie ia ki dukan kiba don hapoh iewduh na duh ka sngi nyngkong ban wan kata ka 22 tarik u jylliew 2020. Kane ka rai ka long hadien ba u symbud myntri rangbah, lem bad ki minister u CEM ka KHADC bad u Syiem ka Hima Mylliem ki la leit ban jurip ia iewduh mynta ka sngi.

Haba iakren bad ki lad pathai khubor na ka liang u bah Prestone, u la iathuh ba ki dukan kiba don hapoh ka iewduh la shah ban plie tang ia ki 1222 tylli bad ka jingplie ia kine ki dukan kan long 30% -33 % shisngi, lait noh tang ki dukan kiba don ha basa doh (dukan die dohmasi bad doh sniang) ki dukan ha basa Dohkha, ki basa kwai tympew,ki basa jhur bad ki dukan die kot ym pat shah ban plie.

U bah Prestone u la iathuh ruh ha Iewduh don palat 1000 ngut ki briew kiba die jingdie ha madan, hynrei yn ym pat shah ban ia ki briew ban die madan ha iewduh. U la ong ruh ba kiwei pat ki dukan yn sa shim pat ka rai hadien ba la sdang shuwa ban plie ia ki katto kane tylli ki dukan, kiba don ha iewduh.

U bah Prestone u la iathuh ruh ba ka sorkar jylla ka la shim ia ka rai ba naduh ka 29 tarik u jylliew 2020 la shah ban plie ia ki iew kiba ju long shisien shitaiew ha baroh kawei ka jylla lait noh tang ia ki Border Hat (International Border) bad ia ki iew kiba don ha ki jaka khappud bad ka Assam kin dang khang shuwa.