Naduh shwa ka jinglaitluid, ka jingbam doh masi, ka dei ka jingmlien ki Khasi, ong ki Rangbah Shnong

Shillong:Ka Synjuk ki nongsynshar shnong ka Bri U Hynniewtrep, ka la thoh sha ka Deputy Commissioner, East Khasi hills, Shillong, ha kaba iadei bad ka jingthmu ban pynlong ia ka jingiaid paidbah, ban dei kmie ia ka masi, ha ka 2tarik Risaw 2024 bad la shim, ba kaba kum katei ka jingthmu ban pynlong ha Shillong, ka long ka bym iahap satia.

Katei ka seng, ka kren shai, ba naduh ha shwa ka jinglaitluid jong ka India, ki briew jong ka Meghalaya bad ka thain shatei lam mihngi, ki la im ha ka rukom im jongki, naduh ka dustur riti, ka bam ka dih bad la ong ruh ba ka jingbam ia ka doh masi, ka dei kaba la ju long ka bynta jong ka jingmlien kaba don ha kane ka jylla bad la ong ruh ba ki jaitbynriew Khasi, ki dei kiba bam dohbha bad katei ka dei ka jingmlien jongki, khlem da pyniahap satia ha ka jingsngew niam.

Kumta na ka liang jong ka Synjuk, ka khot namarkata ia ka Deputy Commissioner, East Khasi hills, ba kam bit ban ai jingmynjur ia katei ka jingiaid paidbah bad ka la ong shuh shuh, ba katei ka dei ka kamram jong ka District, namar ba u myntri rangbah ruh, ula shaniah ia katei ka kam ha ki nongpyniaid district.